nyhende
FHI: Det hastar med å få vaksinert eldre og personar i risikogrupper
Torsdag i kommande veke er det klart for ein ny runde med drop in-vaksinering mot korona i Sveio. FHI melder i sin vekesrapport at talet på innleggingar på grunn av korona har auka med ni prosent.
Den venta vinterbølga med covid-19 er i full gang og framleis aukande. Det hastar derfor å få vaksinert eldre og personar i risikogrupper. Sjukehusa og kommunane må vera førebudde på fleire innleggingar med covid-19, skriv FHI.
Det er varianten EG. 5.1, som allereie har vore i Noreg nokre månader, som no gir auken i smitte.
Drop in på soknehuset
Sveio kommune har allereie planlagt ein ny runde med koronavaksinering. Det skjer som fire timar drop in på Sveio soknehus torsdag 23. november. Du treng ikkje å bestilla time, men får vaksinen når du kjem.
Har du spørsmål eller treng å kontakta vaksinekoordinatoren, kan du ringa kommunen sitt servicekontor eller senda e-post til post@sveio.kommune.no.
Målgruppene
Dette er gruppene FHI anbefaler å ta ein ny oppfriskingsdose i løpet av hausten 2023:
- Aldersgruppa 65 år og eldre, samt sjukeheimsbebuarar
- Aldersgruppa 18-64 år som inngår i ei risikogruppe
- Aldersgruppa 12-17 år med alvorleg grunnsjukdom
- Aldersgruppa 5-11 år med alvorleg grunnsjukdom etter inviduell vurdering av lege. Vaksinekontoret må kontaktast ved behov for vaksine.
- Gravide i 2. og 3. semester
Førre runde var 26. oktober, og då blei køen så lang ein periode at den gjekk på utsida av soknehuset. Langtidsvarselet til Yr melder 6-7 grader 23. november, og at det kan bli mykje regn.
