Fekk ekstra stønad til rullestol-karusell

Han ante fred og ingen fare då mobilen gav lyd frå seg torsdag.

— Eg var på dugnad då eg fekk vita det, seier Tor Inge Flåten, leiar i Førde Bygdalag.

Der var det ei melding om at Kultur-og Likestillingsdepartementet har innvilga bygdalaget sin søknad om stønad med 184.000 kroner.

Kjem i mai

Det skal gå til ein såkalla universelt utforma karusell. Det vil seia at alle kan bruka den, også dei som til dømes sit i rullestol.

Departementet har ei ordning der ein kan søka tilskot til inkluderande tiltak. Den komande karusellen var tydelegvis midt i blinken.

— Den er på veg og kjem i løpet av mai, seier Flåten.

No gjenstår det å velja kva fallunderlag som skal vera på leikeplassen. Leiaren i bygdalaget seier stønaden frå departementet er til stor hjelp.

— Med desse pengane trur eg me kjem langt på veg til fullfinansiering, seier Flåten.

Kjekt å vere bodbringar

Og gladmeldinga kom ikkje frå departementet, men ein litt meir lokal representant.

— Det var Linn Therese Erve (ordførar, Ap) som informerte meg, seier Flåten.

Ordføraren fortel at ho berre vidareformidla bodskapet frå departementet, og at det sjølvsagt er ei glede å få vera den som fortel det.

— Det var veldig kjekt. Dei gjer utruleg masse god jobb. Eg veit dei har jobba mykje for å få pengar til leikeplassen, og dette vert eit flott supplement til kva dei har der nede, seier Erve.

Måndag 15. mai får alle innvilga søkarar beskjed, så Førde Bygdalag går inn i helga med gladnyheita på forskot.

Til saman var det 1.363 søknadar, og bygdalaget vart ein av 338 mottakarar.