nyhende
Feira stor dag med karneval
Bua kultur- og friluftsbarnehage markerte tysdag at dei har eksistert i fem år, og at dei har blitt ein såkalla EQ-barnehage.
Dagen vart feira med karneval på dagen for barna.
Til feiringa var også Sveio-ordførar Linn Therese Erve og barnehagefagleg rådgjevar Gunnhild Staupe inviterte. Og begge hadde tatt utfordringa med å kle seg ut på strak arm.
Dei kom utkledd som høvesvis Anna fra Arendell frå filmen Frost og ei heks.
Populært var også showet til Klovnen Knut, som leste «Noregs Løver» for barna, og tok dei med på musikalske innslag.
EQ-barnehage
På kvelden var det duka for foreldremøte, kor dei føresette fekk eit lite innblikk i kva EQ er.
På møtet deltok også Anette Hovda frå Småfolk barnehage i Etne, som også er EQ-barnehage.
EQ står for emosjonell intelligens.
— Å vere ein EQ-barnehage vil seie at et me har fokus på å møte barn, føresette og kollegaer med grunnforståinga om at alle gjer så godt dei kan ut frå sine føresetnadar. Dei tilsette i barnehagen er opptatt av å gi barna støtte i å meistre motgang, handtere utfordringar og å bli kjent med eigne og andre sine kjensler, fortel dagleg leiar Silje Huse.
Personalet er kursa
Ho er stolt over at 85 prosent av personalet har gjennomført 1 år med kursing i EQ-kompetanse.
— Vi gler oss til å jobbe vidare med dette ut mot barna, dei tilsette og etter kvart enno meir ut mot foreldra også, seier Huse.
