Fann forsøpling nær drikkevasskjelde

Helge Mørk Jensen går kvar helg tur frå Fjellstad til Mølstrevåg. Forrige veke prøvde han ein ny rute gjennom Krossleite, og vart forferda over det han fekk sjå langs stien.

— Eg tenkte eg skulle gå ein annan veg og så vart eg veldig frustrert over korleis folk oppfører seg når eg fann dette, seier Jensen.

På sykkelstien som kryssar Tveitevegen ved fylkesveg 47 fekk han auge på meir og meir boss. Bildekk og motordelar ligg delvis under vatn i ein bekk, og søppel er strødd langs stien eit stykke innover.

— Slik gjorde folk i gamle dagar, men vi er ferdig med den tida, seier han.

Byggmaterialar og ein haug med treverk ligg strødd til sida, med noko plast i ein dam bak. Ein godt rusta sykkel har nesten vorte slukt av mose og gras.

På eit punkt ligg eit dekk på venstre og ein bilmotor på høgre side av vegen.

— Det er frå ein BMW, seier han.

Som tidlegare bilmekanikar kjenner han motortypen igjen, og synast ikkje noko om plasseringa.

— Du kan sjå på tilstanden at dei har lagt her i mange år, seier Jensen.

Det tok ikkje lang tid før alvoret i kor forureininga ligg gjekk opp for han. Bekkane i nærleiken er i nedslagssområdet til Forevatnet, og renn ut i det som er eit reservevatn for Sveio.

— Ein snakkar mykje om mikroplast og plast i naturen. Dette kan jo ikkje vere bra, seier han.

Usikkert kven som haldast ansvarleg

På nettsida til Sveio kommunen blir det opplyst at dei kan gje pålegg om opprydding til den ansvarlege.

Vestavind har snakka med grunneigar, men korkje grunneigar eller Jensen har noko aning om kven som har forureina området.

— Eg synast det er heilt sjukt at folk kjem her og dumpar boss, seier grunneigar.

Grunneigar har tidlegare rydda der sjølv etter at det vart kasta boss der for minst tre år sidan. Då fekk han vekk det meste utanom bilmotoren, den vart for tung å flytte sjølv. tter ryddinga sat han opp fleire store steinar for å hindre meir innkøyrsel med bil. Likevel har nokon klart å kaste mellom anna ei vaskemaskin inne på stien.

Konstituert rådmann Ingunn Toft og kommunalsjef for utvikling Kenneth Tollefsen synast det er trist at boss vert dumpa i naturen. På eit kart over kommunen bekreftar Tollefsen at forureininga er i nedslagssområdet til Forevatnet.

— Det er forureininga me er oppteken av, det er jo i nærleiken av ein drikkevatnkjelde, seier han.

Vil gjere ekstra vurderingar

Ansvarleg einingsleiar er bortreist når førespurnaden om forureining vert besvart, så difor kan ikkje dei gjeve eit sikkert svar om kven som får ansvaret for opprydding.

— I utgangspunktet er det grunneigar som er ansvarleg, men vi må gjere litt ekstra vurderingar rundt dette, seier Tollefsen

Kva kommunen vil gjere med informasjonen om forureininga vil avklarast når einingsleiar kjem tilbake. Toft og Tollefsen reagerer begge på kva som vart funne av tipsar, både grunna nærleik til reservevatnet og at mykje av det kan ein kaste gratis.

— Det er jo gratis å levere ein gamal vaskemaskin, seier Tollefsen.

Rådmannen rosar tipsaren, og oppfordrar andre som finn eller veit om boss i naturen å sei ifrå.

— Det er viktig at kommunen vert kjend med det, seier Toft.

Skal bli hovudvatn for Sveio

Måndag den 26. september vedtok eit samrøysta kommunestyre å byggje nytt vassbehandlingsanlegg ved Forevatnet for å ta det i bruk att som hovudvatn.

Sveio får i dag brorparten av drikkevatnet sitt frå Joavatnet i Førde og resten kjøpast i frå Haugesund.

Grunna krav om økt tryggleik til forsyning av drikkevatn måtte Sveio øke sin kapasitet. Valet var difor mellom eit samarbeidsprosjekt med fleire andre kommunar med minimumskostnad på om lag 150 millionar kroner for Sveio, eller å ta Forevatnet i bruk att til om lag 36 millionar kroner.

Ifølgje saksdokument frå rådmannen viser både analysar og prøvar tekne frå Forevatnet at det er godt eigna til råvatn for drikkevatn-produksjon.