nyhende
Fanga spesielt fly-fenomen over Sveio
Ein mann på Krosselitet i Sveio kika opp på himmelen fredag føremiddag, og fekk auge på noko spesielt.
Kondensstriper, mest sannsynleg frå to fly, danna ein klår V på sydhimmelen over Sveio fredag føremiddag.
Ole Torbjørn Eike på Krossleit knipsa av det spesielle fenomenet cirka klokka 10.40 fredag.
— Det var litt merkeleg å sjå ein slik v-forma på himmelen, seier Eike.
— Litt artig
Han understrekar at han berre syntest fenomenet var litt spesielt og artig, og legg for eiga rekning til at han ikkje trur at stripene har samanheng med dei litt urolege gepolotiske tidene me er inne i.
For orden skuld: Det er ikkje meldt om spesielle flyhendingar i området.
Vestavind har sjekka appen Flightradar34, ein app som registrerer flytrafikken. Den syner at fleire fly har kryssa Haugalandet i den aktuelle halvtimen før bildet vart tatt. Det er gjerne dei mest høgtflygande som legg igjen stiper som kan bli hengande att ei god stund.
Gamal DC-8?
Ei stripe kan til dømes henge att frå eit Norwegian-fly på veg frå Bergen til Malaga, eventuelt eit KLM-fly frå Bergen til Amsterdam. Eit kryssande Airbus A330 frå Hi Fly, på veg frå den tyske hovudsaten Berlin til Vancouver i Canada kan også vere involvert.
I det aktuelle tidsrommet var også eit eldre fly av typen Douglas DC-8 på veg frå Katowice i Polen til Piedmont i Nord-Carolina i USA. Flightradar24 hadde ikkje sikker identifikasjon på dette flyet.
