DNB-kundar har fått doble Nav-utbetalingar – kjem av IT-problem hos DNB

– No har eg fått dobbel pensjon i nettbanken til DNB igjen. Det står inne rundt 80.000 kroner, utbetalt i to separate betalingar, seier ein innringjar til VG torsdag morgon.

Vedkommande fortel at pengane står som disponible på brukskontoen.

Feilen ligg hos DNB

Til NTB opplyser Navs pressevakt Nafisa Zaheer at dei ikkje kan sjå at det er nokon feil i Navs system, og DNBs pressevakt Vidar Korsberg Dalsbø stadfestar at feilen ligg hos dei.

– Vi har oppdaga at vi har nokre IT-problem slik at det kan sjå ut som om feilen ligg hos oss. Omfanget veit vi ikkje enno, men det kan sjå ut som om det er eit stort tal personar som har fått for mykje utbetalt, seier han til NTB.

DNB jobbar med feilretting og seier at kundane ikkje treng å gjere noko.

– Kundane kan heller ikkje nytte seg av midlane på konto. Vi vil rette opp i dette så fort som mogleg, og pengane vil forsvinne frå konto og ikkje vere disponible, seier han til NTB.

Må betale tilbake

Kundar som nyttar seg av dei feilaktig utbetalte midlane vil då måtte betale tilbake desse.

Årsaka til IT-problema er det for tidleg å seie noko om.

Det same skjedde i juni i år. Då fekk ein halv million pensjonistar og uføretrygda for mykje utbetalt av DNB. Pengane måtte betalast tilbake.