nyhende
– Det må bli like enkelt å lada som å fylla bensin og diesel
– Det er ikkje tvil om at mange elbilistar ønskjer hurtigladarar langs hovudfartsårane. Det må bli like enkelt å lada som å fylla bensin og diesel, seier Unni Berge i Norsk elbilforening.
Det er rundt 3700 hurtigladarar fordelt på 400 000 elbilar i landet no. Innan 2025 vil det vera behov for 10 000 ladarar.
Norsk elbilforening er ein medlemsorganisasjon som for over 90 000 medlemmer, i hovudsak private bilistar. Samfunnskontakt Unni Berge kan opplysa at seks av ti som kjøper ny bil velgjer elektrisk, i åra som kjem er det forventa at færre og færre vel fossilt.
– Med Stortinget sitt mål om at alle nye bilar skal vera nullusleppsbilar i 2025, må infrastrukturen på plass. Det er naturleg å ha gode ladetilbod langs hovudfartsårane. Det er myndigheitene sitt ansvar å sikra gode rammevilkår, seier Berge.
Treng støtteordningar
Kommunane har også ein jobb å gjera, når det kjem til å setja av areal til ladestasjonar der det trengst, og samarbeida med lokale kraftselskap.
– Støtteordningar er på sin plass. Det trengst også godt samarbeid mellom utbyggarar og offentlege aktørar, seier Berge.
Ho er klar på at det kjem til å bli eit trøkk i åra som kjem, då er det viktig å ha nok hurtigladarar på plass. Bilane vil også få større batteri, som gjerne tar opp mot 45 minutt å lada.
– Dei fleste synest det er greitt å stoppa for ein matbit, gå på toalettet og venta på eiga lading, men om ein skal venta på andre også, kan det blir for mykje, seier Berge.
