nyhende
Det er venta at vaksinen kjem til Sveio i januar
Éi koronavaksine har fått mellombels godkjenning, denne kjem også til Noreg – og mest sannsynleg til Sveio i januar.
– Det er enda ikkje kjent kva tid, eller kor mange vaksinar Sveio vil få i første omgang. Dette vil det koma nærmare informasjon om, men blir mest sannsynleg tidleg i januar 2021. Dei som er aktuelle for vaksine i første omgang, vil bli kontakta av kommunen, fortel kommunalsjef for helse og omsorg, Ingunn Toft.
Først når større mengder av vaksiner blir tilgjengeleg, vil det bli aktuelt med massevaksinasjon.
– Kommunane hadde frist til 18. desember med å senda inn vaksinasjonsplan til Fylkesmannen, som beskriver gjennomføringa av sjølve vaksinasjonane, så me er godt førebudde, seier Toft, og viser til Folkehelseinstituttet si prioritetsliste over grupper:
- Bebuarar i sjukeheim
- Alder 85 år og eldre
- Alder 75-84 år
- Alder 65-74 år
- Einskilde personar med høg risiko (ulike sjukdommar/tilstandar) 18-64 år
Testa ut i studiar
I følgje Folkehelseinstituttet er det sett inn store ressursar for å utvikla gode vaksinar. Ei rekkebioteknologiselskap, globale vaksineprodusentar og andre organisasjonar er i gong med å utvikla vaksinar mot koronasjukdom.
Nokon av desse har komme så langt at dei har starta prosessen for å bli godkjente av legemiddelstyresmaktene. Det er strenge krav til kvalitet, effekt og sikkerheit. Ein vaksine blir berre godkjent dersom nytten blir vurdert som langt større enn risikoen.
Koronavaksinen Comirnaty frå BioNTech og Pfizer er den første koronavaksinen som har fått på vilkår (mellombels) godkjenning av det europeiske legemiddelkontoret (EMA) og Europakommisjonen. Godkjenninga som vart gitt 21. desember 2020 gjeld for EU/EØS og inkluderer Noreg.
Vaksinen er testa ut i store studiar der fleire tusen personar har fått vaksinen. Studiane er gjennomførte på same måte som for andre vaksinar, men observasjonstida er kortare. Betinga godkjenning betyr at det finst nok data til å vurdera at nytten av vaksinen er langt større enn risikoen, men at vaksineprodusenten må halda fram studiane og fortløpande gi legemiddelstyresmaktene data som kjem til etter kvart.
