nyhende
Debatt om farlege skulevegar
Alle elevar i Vikse-krinsen får framleis fri skuleskyss på strekninga Rv. 541 Buavåg-Torvhidleren-Ekrene på grunn av farleg skuleveg.
I alle fall går formannskapet inn for dette ved å vidareføra ein avtale frå 2013. Men innstillinga blei ikkje vedtatt utan debatt.
– Eg stussar på at denne avtalen blir foreslått vidareført utan vidare, medan dei fleste som søkjer om fri skyss på same grunnlag, for eksempel i Auklandshamn, får avslag, sa Lars Einar Hollund (H).
I hovudutvalet for oppvekst og kultur hadde partifellen hans, John Kristian Økland (H) følgjande forslag:
«Rådmannen får i oppdrag å laga forslag til felles retningslinjer for skuleskyss på skulevegar klassifisert som fareklasse 1. Desse reglane skal redusera behovet for administrativ individuell vurdering av skysstilbodet for 5.-7. klasse.”
Dette forslaget fekk ikkje fleirtal i HOK, og blei heller ikkje vidareført i formannskapet. Men innspelet frå Hollund fekk støtte frå Jarle Jacobsen (KrF) og Monica Valen (Sp). Valen nemnde også vegen nord for Einstabøvoll skule som ei farleg strekning.
