Butikkane får statleg støtte: — Då kan eg kanskje senka skuldrane.

— Det er jo gledelig det, då kan eg kanskje senka skuldrane, seier Laila Vikse Lie.

Som eigar av nærbutikken i Valevåg, saman med mannen Harry, har ho merka behovet for stønad til nærbutikkane.

— Kvar månad sidan januar har eg tenkt «no kjem det, no gjer dei noko». Det har tært på søvnen, seier Lie.

Ho har ikkje fått satt seg inn i ordninga enno, så ho er litt avventande med å feire.

— Det er jo bra viss at det blir sånt. Eg er på vei inn te byen så eg har ikkje fått sete meg inn i det, seier ho.

Dei var ein av om lag 70 nærbutikkar som sendte inn eit opprop til regjeringa, om at dei trong hjelp og var truga av nedlegging.

— Har dykkar endeleg blitt høyrt?

— Ja, då har me kanskje endelig blitt høyrt. Men kven som har høyrt oss veit me ikkje heilt, seier Lie.

Åse Marie Økland som driv nærbutikken i Auklandshamn synast også det verkar som gode nyheitar.

— Det høyrest veldig bra ut, sjølv om eg ikkje har fått sett meg inn i det, seier Økland.

— Bra at me blir sett og huska også, det er aldeles viktig det me gjer uti distrikta, seier ho.