nyhende
Bruktmarknad for MC-utstyr i Sveio
Laurdag arrangerer WIMA Haugalandet bruktmarknad for MC-utstyr ved Sveio Taxi sine lokale i underetasjen på Kiwi-bygget.
I tilknyting til marknaden blir det også ulike utstillingar, fortel Vigdis Christiansen.
Ho er leiar for WIMA Haugalandet, som er eit lokallag av WIMA Norway – Women´s International Motorcycle Association. Lokallaget har rundt 20 betalande medlemmer i Nord-Roglanad og Sunnhordland. Sjølv bur Christiansen på Tysnes.
Direktesal
Marknaden fungerer slik at folk som har brukte køyreklede eller anna MC-utstyr å selja, tar dette med og sel direkte frå bagasjerommet på bilen eller frå motorsykkelen.
Det er første gongen ein slik marknad blir arrangert på Haugalandet. Tilsvarande marknader i Bergen og Telemark har vore svært vellukka. Og sjølv om arrangøren er ein kvinneorganisasjon kan både menn og kvinner delta, understrekar Christiansen.
Utstillingar
WIMA vil ha stand på marknaden. Barneorganisasjonen R4K Vestlandet blir med. Svein Børge Heggen frå Tysvær skal visa fram gamle, restaurerte Harley Davidson-syklar og Astri M. Pedersen Øvrebø frå Karmøy blir med for å visa fram sitt arbeid med dekorering av bensintankar.
Det blir også servering av kaffi og vaflar.
