Bondelagsleiarar på møte om ekstremvêret «Amy»

Norsk Bonde- og Småbrukarlag og Norges Bondelag var tysdag på eit oppfølgingsmøte etter uvêret Amy hos Landbruks- og matminister Nils Kristen Sandtrøen for å formidla status, utfordringar og læringspunkt til statsråden. Landbruksdirektoratet og Mattilsynet var også til stades, skriv Bondelaget på nettstaden sin.

Uvêret Amy ramma store delar av Sør-Noreg førre helg. Heldigvis var det ingen alvorlege hendingar med tap av liv, alvorlege ulykker eller dyrelidingar. Ifølgje Bondelaget mista mange bønder både straum og mobilnett. Uvêret førte og til stengde vegar, flaum og skade på mange bygningar.

Ifølgje Bondelaget fekk Statsråden mellom anna følgjande innspel under møtet:

Straum: Stadig fleire bønder har, eller har tilgang til nødstraumsaggregat. Det er resultatet eit medvite arbeid med beredskapsplanar på kvar enkelt gard, og det er også mykje samhandling lokalt, med utlån av aggregat.

Mobil og nett: Mange opplevde at sambandet fall bort kort tid etter at straumen gjekk. Bøndene fekk ikkje tak i hjelp frå til dømes veterinær eller slakteri, og samfunnet rundt fekk ikkje tilgang til dei ressursane bønder sit på, som traktor eller aggregat.

– Landbruket kan også vera ein ressurs når uveret kjem. Bønder har lokalkunnskap, folk og utstyr. Me jobbar for betre beredskap på den einskilde gard. Slik kan me vera ein ressurs, framfor at me opptek kapasitet hjå beredskapsetatane, seier Gimming til nettstaden.