nyhende
Birkeland tok sitt andre gull i nordisk
Olve Grønås Birkeland (19) frå Sveio kan etter laurdagens feltskyting i Follo kalle seg dobbeltmeister. Og han kan no smykke seg med til saman fire gullmedaljar i ungdomsklassen etter å ha deltatt i tre nordiske meisterskap.
Frå tidlegare hadde den unge sveibuen gull i baneskyting i 2019, gull i feltskyting i Danmark i fjor, gull i baneskyting i Noreg fredag, og laurdag vart det ein ny gullmedalje då feltskyting stod på programmet.
I særklasse
Han skaut solide 41/22 på feltrunden. Det var det ingen andre som var i nærleiken av. Nærmast for Ronja Hammervold som oppnådde 40/19 treff. Bronsemedaljen gjekk til danske Mads Bakke Nielsen med 39/15.
Medaljetrioen var i følgje Norsk Skyttertidende i særklasse betre enn konkurrentane.
God avstandsvurdering
— Eg er kjempenøgd med 41 treff. Vinden var litt vanskeleg å forstå, så eg tok to knepp for mykje der eg mista eitt treff. Samstundes var eg veldig god på avstandsvurderinga i dag, sa 19-åringen sa den nybakte dobbeltmeisteren til Skyttertidene etter sigeren.
19-åringen representerer Haugesund og Sveio skytterlag, og under nordisk meisterskap sjølvsagt det norske landslaget.
