nyhende
Bil stansa etter tips - daudt rådyr funne i hage
Politiet rykka onsdag 18. mars ut etter melding om vinglete køyring på Tittelsnesvegen. Seinare same dag fekk dei òg melding om eit daudt rådyr i ein hage på Mølstre.
Klokka 09.40 fekk politiet melding frå publikum om ein bil som køyrde vinglete og med skiftande fart langs Tittelsnesvegen i Sveio.
Ei patrulje rykte ut og stoppa bilen ved Bømlafjordtunnelen i retning Stord.
– Det synte seg at alt var under kontroll. Patruljen konkluderte med at det var ein uerfaren sjåfør, opplyser vaktsjef ved Haugesund politistasjon, Anna Østensvik-Lu.
Ho seier politiet set pris på at publikum er årvakne og sender inn tips.
Dødt dyr i hagen
Seinare på dagen, i 15-tida, melde ein huseigar på Mølstre frå til politiet om eit dødt rådyr som låg i hagen.
Rådyret skal ha hatt skadar som tydde på at det hadde vore i ein form for kamp.
Viltnemnda blei varsla, og huseigaren fekk råd om å flytta dyret ut i skogen og la naturen gå sin gang, melder vaktsjefen.
