nyhende
Ber om kandidatar til miljøpris
Vestland fylkeskommune ber om forslag på kandidatar til fylkeskommunen sin miljøpris for 2025. Fristen til å koma med forslag er 28. februar.
Miljøprisen er på 70.000 kroner. Føremålet er å synleggera godt klima- og miløarbeid i fylket. Både personar, verksemder og lag og organisasjonar kan nominerast, heiter det i pressemeldinga frå fylkeskommunen.
Så langt er det ingen privatpersonar som har fått prisen. Tidlegare vinnarar er Solstrand Hotel & Bad, Upscale AS ved Eva Sessford, Osvassdragets forvaltningslag og Mjåtveitelvas foreining, Invertapro AS og Bergen Havn.
– Me har mange gode døme på klima- og miljøtiltak som viser att i stort og smått. Fellesnemnaren for vellukka klima- og miljøarbeid er haldningar og vilje til å ta grep. Me ønskjer med prisen å løfta fram dei gode døma, dei som viser veg og motiverer andre, seier fylkesordførar Jon Askeland (Sp).
