Båtforeininga klagar på stoppordre

Bakgrunnen for kommunen sitt vedtak er at både byggeløyvet etter plan- og bygningslova og løyvet etter forureiningslova som blei gitt av Fylkesmannen i Hordaland, er gått ut på dato for fleire år sidan. Igangsettingsløyvet som kommunen gav 8. mai 2018 omfattar utfylling av fem meter og rundt 1.000 kubikkmeter masse. Det er fylt ut meir enn det er gitt løyve til, heiter det også i brevet som saksbehandlar Arne Berg i Sveio kommune sende til båtforeininga 4. september.

Full stopp

– Det blir kravd at alt vidare arbeid med tiltaket, med unntak av naudsynt sikringsarbeid, omgåande blir stoppa fram til det eventuelt ligg føre eit nytt løyve. Stoppordren blir gitt med heimel i plan- og bygningslova utan førehandsvarsel, skriv Berg vidare.

Ifølge igangsettingsløyvet blei firmaet Knut S. Løten Maskin AS godkjent som ansvarleg søkjar, prosjekterande og utøvande for grunnarbeidet. Sidan løyvet er utgått gjeld heller ikkje denne godkjenninga lenger, forklarar Berg til Vestavind.

Han stadfestar elles at kommunen har tatt tak i saka etter fleire munnlege og skriftlege innspel frå naboar i Buavåg.

Krev ny søknadsprosess

Båtforeininga fekk frist til 1. oktober med å gi tilbakemelding «før kommunen eventuelt gjer noko meir i saka,» heiter det i brevet. I eit nytt brev 16. september gjer Berg det klart at båtforeininga må starta ein heil ny søknadsrposess for å koma vidare. Det må søkjast på nytt både til kommunen, Statsforvaltaren og Karmsund Havn, inkludert nabovarsel.

Leiar i Sveio Båtforening Cato Helgesen svarte på det første brevet i ein e-post 5. september og følgde opp med å senda formell klage på vedtaket fredag 20. september. Samstundes ba han om møte med kommunen, noko Berg ikkje stille seg avvisande til.

– Denne stopp-ordren kom svært overraskande på oss. Me meiner kommunen har fatta sitt vedtak på feil grunnlag, seier Helgesen.

– Kunne heller tatt kontakt

Han reagerer på at kommunen korkje tok kontakt eller kom på synfaring før vedtaket om stans blei fatta.

– For oss og våre medlemmer betyr dette eit stort tap både i tid og pengar. Frustrasjonen er difor ganske stor. Når politikarar kjem på besøk, får me ofte høyra kor viktig det er med frivillig arbeid. Her blir me på den andre sida møtt med eit steilt byråkrati som absolutt ikkje er motiverande. Kommunen burde heller ha vegleia oss dersom dei meiner me har gjort feil, seier Helgesen.

Han forklarar kort at moloprosjektet blei sett i gang for å gi ei tryggare hamn og fleire båtplassar, inkludert gjesteplassar. Båtforeiningar har ei venteliste på 20 søknader om båtplassar i dag. Vidare vil prosjektet føra til betre skille mellom ferje- og fritidsbåttrafikk, forklarar han. Det meiner han å vita at ferjemannskapa set stor pris på.

Må venta på billig stein

Båtforeininga samarbeider også med Njord Dykkerklubb, Bua Bygdelag, Gullsjøhuset og Liv & Lyst-prosjektet, og Helgesen meiner verksemda deira medverkar til utvikling av Buavåg og dermed også kommunen.

– Sveio Båtforening er ein liten organisasjon med trong økonomi. Me er difor avhengig av å få tak i rimeleg stein frå entreprenørar som har overskotsmasse til rimelege prisar. Difor har arbeidet tatt så lang tid. Dette kjenner kommunen til frå før, då me fleire gonger har vore i kontakt med dei også for å få tak i masse, seier Helgesen.

– Har hatt synfaring

– Kunne de ha handtert dette på ein smidigare måte ved å ta kontakt med båtforeininga før de fatta vedtaket, Arne Berg?

– Eg veit ikkje om det hadde gitt noko anna resultat. Det er dessutan ikkje rett at me ikkje har vore på synfaring. Me var der ute og såg både i vår og no nyleg, seier Berg.

Han legg til at kommunen ikkje kunne anna enn å reagera då det kom klager frå naobolaget.

Ein som har klaga skriftleg er Lars Bua. Brevet hans er datert 5. september, altså dagen etter at Berg sende sitt brev til båtforeininga.

– Alle fekk ikkje varsel

– Eg meiner saksbehandlinga ikkje var korrekt då løyvet blei gitt. Alle bruka gardsnummer 52, 1-5 skulle hatt nabovarsel, og også dei som har naust eller hus og hytter innanfor moloen, skriv Bua mellom anna.

Han legg til at han ikkje har noko imot den utfyllinga som er gjort til no, men åtvarar mot ei fullstendig stenging for båttrafikk til austre del av vågen. Der er alt no mykje dårleg oksygenert evjebotn, og dette problemet vil auka med meir avstenging. Det vil også bli større problem med islegging om vinteren, hevdar Bua. Han minner også om at det er rikt fugleliv med hekkande terner og svaner og nokre år også ærfugl på skjera utanfor.

Til dette innspelet seier Helgesen at dei lytta til lokalbefolkninga og gått bort frå den opphavlege planen om å byggja moloen heilt bort  til dei omtalte skjera.