nyhende
Barndomsprosjektet er intakt etter over 40 år
– Mykje rart ein finn i «tølene» frå barndomsheimen, erkjenner Ellen Kristine Kjærandsen Hagerup. Det ho siktar til er ein snart 44 år gamal appelsin.
Idéen til å gøyma vekk ein appelsin for å sjå kor gamal den kunne bli, oppstod ein gong ho var med ei venninne heim. Madli Eikehaugen kunne nemleg visa fram ein sitron dei hadde hatt i 25 år.
Eksperiment
– Dette blei eg mektig imponert over og fekk lyst å prøva sjølv, fortel Ellen Kristine Kjærandsen Hagerup som var 12-13 år den gongen.
Som tenkt så gjort, ho kjøpte ein appelsin på butikken hos Haugland, skreiv på datoen «05.03.1977», og la den øvst og innerst i eit kjøkkenskap.
– Og her er den – snart 44 år etter, smiler Ellen Kristine som tykte det var morosamt å finna igjen prosjektet sitt frå barndomen.
Fram i lyset
Den «bortgløymde» skatten fekk bli med henne heim til Sandefjord, der den er plassert godt synleg på ei hylle på arbeidsrommet hennar.
– Appelsinen har for lengst gått ut på dato, men for meg var det ein kjekk ting å finna att. Kastast skal den ikkje, for når den har vore med i 44 år, blir den med vidare, fastslår den utflytta førdebuen.
