Åtvarar mot ferdsel på Vigdarvatnet­­

– Det er eit stort vatn, og det fører med seg ein del usikkerheitsmoment, seier Håkon Aamodt, rådgjevar for plan, eigedom, byggesak og landbruk i Sveio kommune.

Ifølgje rådgjevaren betyr det i praksis at istykkja kan variera ut frå kvar ein oppheld seg langs vatnet.

– Ikkje kommunal oppgåve

– Me har fått inn ein del uro­meldingar frå folk som har observert ferdsel på Vigdarvatnet, seier Aamodt om kvifor kommunen no går ut med ei påminning.

Han peikar på at det ikkje er ei kommunal oppgåve å måla istykkja på dei ulike vatna. Kommunen vil difor ikkje gjera dette, og han minner om at all ferdsel på is skjer på eige ansvar.

– All ferdsel på is bør gjerast saman med nokon som kjenner vatnet, og me frårår all form for ferdsel inntil tjukna er kontrollert, seier rådgjevaren.

Påminning om motorferdsleforbod

Aamodt minner samstundes om at det ikkje er lov å køyra motorisert køyretøy på islagde vatn. Dette gjeld alle vatn, og motorferdsel er berre tillaten i samband med nyttekøyring.

Med nyttekøyring meiner ein nødvendig køyring knytt til oppdrag og arbeid, til dømes rednings- og beredskapsoppdrag, offentleg oppsyn/tilsyn og nødvendig transport i jord- og skogbruk. Rekreasjonskøyring fell ikkje inn under unntaka.