Årets julimånad var den tredje varmaste som er registrert i verda

Gjennomsnittstemperaturen ved jordoverflata var på 16,68 grader, ifølgje berekningar gjort av EUs klimaovervakingsteneste C3S.

Dette var 1,25 grader over førindustrielt nivå. Sjølv om juli var uvanleg varm i eit historisk perspektiv, var temperaturane lågare enn i fjor og forfjor.

Ein to år lang periode der dei aller fleste månadene var meir enn 1,5 grader varmare enn i førindustriell tid, ser no ut til å vere over.

1,5 grader er sette som «grense» av verdssamfunnet for å avgrense den globale oppvarminga til eit forholdsvis trygt nivå.

– Har ikkje stansa

– To år etter den varmaste julimånaden som nokon gong er registrert, er rekka av globale temperaturrekordar broten. Men det betyr ikkje at klimaendringane har stansa, seier direktør Carlo Buontempo i C3S i ei fråsegn.

– Vi held fram med å sjå verknaden av at verda blir varmare, legg han til.

Blant områda som i juli skilde seg ut med uvanleg høge temperaturar, var Himalaya-fjella, Kina, Japan og Skandinavia.

Sverige og Finland var sterkt påverka av hetebølgjer, ifølgje C3S. I Noreg var det hetebølgjer i alle fylka, ifølgje Meteorologisk institutt.

Hetebølgja i Evenstad i Stor-Elvdal var den lengste som nokon gong er registrert i Noreg – med 15 dagar på rad med temperaturar på minst 27 grader.

Rekordvarme i Norskehavet

Pakistan og det nordlege Kina opplevde kraftig regn og flaum førre månad. Skottland og Hellas sleit med å få kontroll over brannar i terrenget, som auka i styrke etter vedvarande tørke.

Også søraust i Europa var det svært varmt, og i Tyrkia vart det for første gong målt temperaturar over 50 grader.

I Norskehavet, delar av Nordsjøen og eit område i Nord-Atlanteren vart det målt rekordhøge temperaturar ved havoverflata. På verdsbasis var den gjennomsnittlege havtemperaturen den tredje varmaste som er registrert i juli.

Også i Noreg var snittemperaturen førre månad den tredje varmaste som nokon gong er registrert i ein julimånad.