nyhende
Arbeidsløysa opp i Sunnhordland, men ned i Sveio
I juli var 1,2 prosent av arbeidsstyrken registrert som heilt ledig i Sunnhordland. Det er ein auke på 39 personar samanlikna med førre månad, og 61 fleire samanlikna med juli året før.
Stord hadde den lågaste arbeidsløysa i Sunnhordland med 0,9 prosent, eller 85 heilt ledige.
I Sveio gjekk talet på heilt ledige ned frå 38 i juni til 33 i juli. Det utgjer 1,2 prosent av arbeidsstyrken i kommunen, og er på same nivå som juli i 2023.
Sesongvariasjonar
– Det er normale sesongvariasjonar som ligg bak. Me ser at talet heilt ledige aukar, medan talet delvis ledige og ledige på tiltak minkar – i tråd med ferietidene. Me vurderer framleis at arbeidsløysa er særleg låg, og den total arbeidssøkarbehaldninga går faktisk litt ned frå juni, seier Håvard Lægreid, leiar i NAV region Sunnhordland.
Samstundes aukar delen langtidsledige til over 40 prosent for første gong sidan juli i fjor.
– Me ser ein naturleg oppgang i langtidsledige kring juli, men kjem til å følgja den vidare utviklinga tett. Me ventar at delen langtidsledige skal gå ned att i august, seier Lægreid.
Fleire ukrainarar i arbeid
For Vestland fylke viser tala for juli 6.443 personar heilt arbeidsledige. Det utgjer 1,9 prosent av arbeidsstyrken.
Det er 654 fleire heilt ledige enn på same tid i fjor. Snittet for landet samla ligg på 2,1 prosent heilt ledige.
For første gong er meir enn kvar femte av dei fordrivne frå Ukraina mellom 20 og 66 år i arbeid i Vestland. Det er om lag det same som snittet for landet.
– Me ventar at talet vil halda fram å stiga. For å få nytte av den arbeidskrafta og kompetansen dei har med seg, er me avhengige av eit godt samarbeid med bedriftar og næringsliv, seier fungerande fylkesdirektør Knut Steinar Eitungjerde i NAV Vestland.
