Arbeidsløysa går ned – 55 utan arbeid i Sveio

I Sveio er det i desember registrert 55 heilt arbeidsledige, det er to færre enn same tida i fjor. Tal frå NAV fortel at 13 av arbeidssøkarane er i tiltak.

Tar ein eit overblikk på regionen Sunnhordland går det rette vegen denne månaden – sidan november har 47 arbeidsledige fått seg jobb, no er arbeidsløysa på 2,6 prosent. På landsbasis er snittet 3,8 prosent.

– Me avsluttar no eit svært krevjande år, der me har opplevd ei krise ulik alle andre. Koronakrisa råka oss då aktiviteten i arbeidsmarknaden var på topp. Ein av konsekvensane vart ei skyhøg arbeidsløyse. Heldigvis kom aktiviteten raskt i gong igjen for fleire, og det er gledeleg å sjå at mange har kome attende i jobb, seier Astrid Østerlid, leiar i NAV region Sunnhordland.

Arbeidsløysa var på det meste 7,5 prosent av arbeidsstyrken i mars månad. Over 2 300 heilt ledige var registrert hos NAV.

– Arbeidsløysa er framleis høgare enn før koronakrisa, og det vil ta tid før arbeidsmarknaden er normalisert. Den største bekymringa vår er for dei unge, personar utan utdanning, langtidsledige og permitterte i næringar som vart hardast råka av krisa. Me er også spent på om det er alle bedrifter som vil klare seg gjennom denne tida, seier Astrid Østerlid.