nyhende
Ap går mot sitt svakaste kommuneval sidan 1945
Arbeidarpartiet går kraftig ned, medan Høgre gjer eit hopp på Opinions kommunevalmåling i mai. Ap får 20,3 prosents oppslutning. Høgre ligg på 27,7 prosent.
Det går fram av kommunevalmålinga gjort på oppdrag for Altinget og ABC Nyheter.
Dersom dette skulle bli valresultatet i september vil Ap gå 4,5 prosentpoeng ned frå det som til no har vore det aller dårlegaste lokalvalet for partiet, i 2019.
Også regjeringspartnar Senterpartiet går på ein kraftig smell. Samanlikna med lokalvalet i 2019 går Sp tilbake heile 8 prosentpoeng, og får 6,4 prosents oppslutning.
Katastrofal for begge regjeringspartia
Statsvitar Svein Erik Tuastad seier til ABC Nyheter at målinga er katastrofal for begge regjeringspartia.
— For Senterpartiet er tilbakegangen endå større. Men då må vi hugse at dei har hatt ein periode og nokre val no der dei har lege svært høgt, kanskje kunstig høgt gitt kor viktig periferidimensjonen er i norsk politikk, samanlikna med vanleg oppslutning for dei. Senterpartiet er på ein måte tilbake til vanleg oppslutning no, seier han.
7,6 prosentpoeng opp frå 2019
For Høgre er målinga lystigare lesnad. Partiet får 27,7 prosent, noko som vil vere ein auke på 7,6 prosentpoeng frå valet i 2019. Frp ligg derimot relativt uendra samanlikna med resultatet i 2019. Dei får 8,9 prosents oppslutning, fram 0,7 prosentpoeng frå 2019.
Oppslutninga til partia er som følgjer (endring frå valet i 2019 i prosentpoeng):
- Høgre: 27,7 prosent (+7,6)
- Ap: 20,3 prosent (-4,5)
- Sp: 6,4 prosent (-8,0)
- Frp: 8,9 prosent (+0,7)
- SV: 8,2 prosent (+2,1)
- Raudt: 4,1 prosent (+0,3)
- Venstre: 5,8 prosent (+1,9)
- MDG: 5,4 prosent (-1,4)
- KrF: 3,7 prosent (-0,3)
- Andre: 9,3 prosent (+1,4)
1.000 personar er spurde i målinga som er gjennomført frå 25. til 29. april. Feilmarginen varierer mellom 1 og 3 prosentpoeng. Dei største partia har dei største feilmarginane.
