1 kilometer i timen frå å mista førarkortet

Det er mogelegvis ein av dei vanlegaste stadene kor Utrykkingspolitiet held kontroll. På strekninga sørover frå Haukås og krysset mellom E39 og fylkesveg 47, vart fleire tekne onsdag.

– 18 forenkla førelegg grunna fart i 80-sona. Den høgaste var 115 kilometer i timen, seier betjent Idar Helland i den lokale UP-patruljen.

Å køyra 115 kilometer i timen i ei 80-sona betyr at ein berre er 1 kilometer i timen unna frå å få førarkortet beslaglagt.

Kontrollen varte frå klokka 10 til rundt klokka 15. I den tida vart det skrivne ut tre forenkla førelegg til sjåførar som ikkje stansa ved stopp-skiltet mellom fylkesveg 47 og E39.

Vidare vart eit forenkla førelegg skrive ut grunna forbikøyring i sperreområdet, og to lette motorsyklar vart kalla inn til teknisk kontroll hos Statens Vegvesen.