– Dette er ein milepæl for oss

− Store, bakkemonterte solkraftverk er nytt i Noreg. Anlegget i Sveio kommune er det niande solkraftverket som får løyve frå oss, seier Ann Myhrer Østenby, seksjonssjef i NVE.

Solkraftverket vil ha ein årleg forventa straumproduksjon på i overkant av 10 GWh (gigawattimar). Dette svarar til den årlege energibruken til om lag 500 hushald, skriv NVE i ei pressemelding.

Andre konsesjon for Endra

– Me er veldig glade for å ha fått konsesjon. Dette er den andre konsesjonen me har fått frå NVE, så dette er ein milepæl for oss, seier Gautesen til Vestavind.

Endra AS er blant to til tre aktørar som har fått meir enn éin konsesjon til å bygga solkraft i Noreg, ifølge direktøren. Han legger også til at prosjektet i Sveio kan bli landets første prosjekt som kombinerer landbruk og solkraft.

– Området, som i dag blir brukt til sauebeite, vil gi ein vinn-vinn-situasjon der ein får dobla arealbruken. Vegetasjonen blir halde nede rundt solcellepanela, samtidig som gardeigar fortsatt kan bruka området til beite for sauene.

Rundt 80 millionar

– Kan innbyggarane i Sveio håpa på billigare straum?

– Generelt sett blir straumen mata ut på kraftnettet. Prisdanninga på straum er delt inn i prisområde i Noreg, men jo meir ny kraft me tilfører kraftnettet, desto billigare kan straumen bli i teorien. For å oppnå lågare straumprisar i Noreg må me bygga meir kraft, og det er ein viktig grunn til at megjer dette, seier Gautesen.

Området det er snakk om har et areal på om lag 15 hektar, ifølge direktøren, og han anslår at heile prosjektet vil kosta rundt 80 millioner kroner. Det er Endra sjølv som vil finansiera og eiga anlegget.

Håper på byggestart om eit år

Når byggestarten blir og når panela vil stå klare, er enno ikkje fastsatt, fortel Gautesen.

– Det kjem litt an på. No vil me jobba vidare med å modna prosjektet fram mot ein investeringsbeslutning. Eg er litt usikker på kor lang tid det vil ta, men i utgangspunktet håper me å kunna begynna og bygga innan eit års tid. Det avheng av kor lang tid ulike prosessar tar.

Gautesen fortel at det var grunneigar Steinar Nesse som tok initiativ til prosjektet.

– Fleire positive sider

Nesse hadde allereie fått beskjeden når Vestavind tok kontakt. Han seier at han er glad for at konsesjonen gjekk gjennom.

– Det er fleire positive sider ved dette prosjektet. Eg vil blant anna få leigeinntekter, samtidig som straumnettet blir forsterka og forsyningssikkerheita blir betra – noko som er viktig når ein driv med slakt.

Nesse håper at arbeidet med solkraftverket kjem i gang i løpet av året, og legg til at det er tryggande at prosjektet blir gjennomført via det lokale kraftselskapet Haugaland Kraft.

Omsyn til miljø

NVE har stilt ei rekke krav til at anlegget skal byggast og drivast så skånsamt som mogleg.

− For å redusere dei negative verknadene for miljøet har me mellom anna stilt krav om at kantvegetasjon langs bekkar og vassdrag i planområdet skal bli ivaretatt, seier Myhrer Østenby.

Før bygginga kan starta skal det utarbeidast ein detaljplan, som er ei meir detaljert beskriving av prosjektet og byggefasen. Denne sendast på høyring før NVE vedtar planen.