Me må gripe moglegheitene!

Minst 3 millionar i tilskot til aktivitetar for våre born, unge og eldre har synleg gått hus forbi både rådmann og ordførar!

«Sveio kommune går økonomisk utfordrande tider i møte». Slik var konkluderinga i rådmannen si orientering til kommunestyret 22. februar 2021, med ønskje om å iverksetja kraftige innsparingstiltak, blant anna saka om skulenedlegging. Me i Sveio Høgre stiller oss då undrande til korleis ein har råd til å la over 3 millionar i tilskot gå oss «hus forbi», når den økonomiske stoda er så utfordrande. Dette er tilskot direkte retta mot born, unge og eldre – viktige, men også sårbare grupper i kommunen.

Sveio Høgre har både oppfordra til å søkje, men også ved fleire høve stilt spørsmål til ordførar og rådmann kring vurderingane som er gjort rundt dei ulike støtteordningane som ein ikkje har søkt på.

Tilskot til å fremje aktivitet hjå born og unge. «Fritidskortet» er eit pilotprosjekt med mål om at fleire born og unge får delta i faste, organiserte aktivitetar. Kommunen ville som del av prosjektet fått eit tilskot på mellom 800-1000,- pr. born i alderen 6-18 år. Dette ville for Sveio kommune sin del rekna seg til om lag 2 millionar, i tillegg kunne ein søke om 500.000,- til dekking av administrasjonskostnadar. Oppfordringa til å søkje vart nedstemt av Ap og FrP i Formannskapet 03.02.20 med grunngjeving at administrasjonen hadde avgrensa kapasitet.

I Vestavind 22. april les me om interpellasjonen Sveio Høgre retta til ordførar og rådmann i førre kommunestyremøte, etter at ein igjen ikkje hadde søkt om moglege tilskot til born og unge. Denne gongen kunne Sveio kommune fått 653.000,- til å arrangere sommarskule. Eit tilbod som kunne vore organisert enten av kommunen sjølv, eller av dei flotte laga og organisasjonane me har i kommunen. Som tidlegare kjem knappheit av tid og ressursar i vegen for flotte, og etterspurde tiltak til våre unge lovande.

Tilskot til styrking av helsestasjon og skulehelsetenesta. Helsestasjonane og skulehelsetenesta bidreg til å gje born og unge ein trygg og god start i livet. Dei føl opp kvinner og familiar i svangerskapet og i barselperioden. Koronapandemien har ytterlegare vist kor viktig denne tenesta er. Det var difor svært gledeleg å sjå at regjeringa i år løyva 1,3 milliardar til satsinga på lågterskeltilbod til born, unge og deira familiar. Summen inkluderte 389 millionar i øyremerka midlar til helsestasjonane og skulehelsetenesta. 296 av landets 356 kommunar fekk tilskot frå dei øyremerka midlane i 2021. Sveio kommune var igjen diverre ikkje ein av desse kommunane.

Rundt oss ser me at Haugesund fekk tildelt over 2,7 millionar, Stord 2,3 millionar og Bømlo 1,4 millionar, for å nemna nokre.

Ved å summera litt over, ser ein at me i Sveio har gått glipp av over 3 millionar kroner i tilskot til våre born og unge.

«Leve heile livet» – tiltak for å sikre ein trygg og aktiv alderdom. Eldre er ei viktig gruppe i kommunen. Dei har under pandemien opplevd mykje sosial isolasjon, og det er difor gledeleg å sjå at regjeringa er ute med fleire gode tilskotsordningar som også femner denne gruppa. Det er ikkje lenge igjen til søknadsfristen her, men me vil oppmoda ordføraren og råmannen til å drive fram søknadar til desse tiltaka.

«Eldre ut på middag» er eit prosjekt med formål om å motvirke dei fysiske og psykiske konsekvensane av sosial isolasjon, og legge til rette for at eldre igjen kan vere del av eit sosialt fellesskap etter at vaksinasjonen mot koronavirusinfeksjonen er gjennomført. Tilskotsordninga gjer at kommunen kan samarbeide med lokale restaurantar og drosjeselskap for å tilby billege middagar for heimebuande eldre over 65 år. Tilskotsordninga er i tråd med regjeringa si satsing «Leve heile livet». Tilbodet kan gje ei flott oppleving for dei over 65 år, samstundes som det bidreg positivt for serveringsstadane, og transporttilbydarane.

Midlar for å auka dei eldre sin kompetanse til digitale tenester.Sidan helseinformasjon og helsetenester stadig blir meir digitale, er det særleg viktig å gjera eldre i betre stand til å motta slike tenester. Helsedirektoratet har difor lyst ut at det nå kan søkjast om midlar for å styrka den digitale kompetansen hos eldre. Både kommunar, frivillige og ideelle organisasjonar kan søkja. Me vil difor oppfordra kommunen i samarbeid med Sveio seniornett eller andre organisasjonar til å vurdere å søkja om slikt tilskott. Det er i dette høvet framleis tid til å laga søknad, sidan fristen først er 21. mai 2021.

Me i Sveio Høgre jobbar aktivt for heile kommunen, gammal som ung, uavhengig kor ein bur. Me ynskjer å bidra til eit styrka tilbod – tilgjengeleg for dei som ynskjer det. Me håpar difor at kommunen framover nyttar seg av dei flotte tiltakspakkane regjeringa kjem med, dette vil etter vårt syn kunne auke tilboda, utan å presse økonomien ytterlegare, og såleis gjere Sveio til ein endå betre plass å bu!

Sveio Høgre
John Kristian Økland, Mikal Møller Hovda og Lars Einar Hollund (kommunestyregruppa)
André Mundal Haukås (leiar)