Legg ny E39 heilt utanom Førdebygda

Førde Bygdalag reagerer med undring og skuffelse over Vegvesenet sitt forslag til trasé for ny E39 framom Førde. Planane tar altfor lite omsyn til bygdesamfunn, natur og friluftsliv.

Me vil særleg peika på to forhold:

1. Vegen er lagt unødvendig tett på bygda

Den tilrådde traseen er lagt overraskande nær busetnaden i Førdebygda. Resultatet vil bli store og unødvendige inngrep i eit levande bygdesamfunn. Konsekvensane er tydelege:

• Hus, gardstun og hytter vil bli ramma.
• Dyrka mark og beiteområde vil bli bygde ned.
• Vegen kjem tett innpå bygda sine tre viktigaste samlingspunkt: kyrkja, bedehuset og samfunnshuset.
• Ein firefelts motorveg på høg fylling vil bli eit massivt og skjemmande inngrep i landskapet.

Det er vanskeleg å forstå kvifor ein vel ei slik løysing, når det finst alternativ som i langt større grad tek omsyn til bygda.

Førdebygda ligg i eit vakkert område med stort potensial for reiseliv og friluftsliv. Attraksjonar som Rex Garden, Førdespollen og strandområda trekkjer allereie mange besøkande. Ei høg vegfylling tett innpå bygda vil for alltid endra landskapsbildet.

Vi meiner det er fullt mogleg å leggja traseen nokre hundre meter lenger aust utan at kostnader, køyrelengde og reisetid vil auka. Ei flytting vil, verna busetnad og jordbruksområde, gi større avstand til forsamlingshusa og redusera støy og visuelle inngrep i bygda.

2. Naturinngrep ved Lier som er vanskeleg å forsvara

Her planlegg Vegvesenet ei høg og lang fjellskjering i Lierfjellet – rett over hovudet på folk som bur i Nedre Lier i eit terreng som nærast er skapt for tunnel-bygging.

Dette området er eit viktig natur- og friluftsområde for heile regionen. Konsekvensane vil vera:

• store inngrep i eit levande kulturlandskap
• øydelegging av mykje brukte tur- og rekreasjonsområde
• skade på viktige skogbruksområde
• tap av leveområde for hjortevilt

I området ligg også speidarhytta til Ryvarden speidarkrets, omgitt av mykje brukt turterreng mellom Liervatn og Joavatn.

Det er difor vanskeleg å forstå kvifor Vegvesenet vil leggja ein firefelts motorveg gjennom nettopp dette området – i staden for å velja ei løysing med tunnel gjennom Lierfjell. Mest mogeleg veg i tunnel i dette området vil samtidig gi best vern av Joavatn som drikkevasskjelde.

Det er verdt å minna om at Norge gjennom den internasjonale Montreal-avtalen av 2022 har forplikta seg til å stoppa eller kraftig redusera tap av natur. Denne avtalen burde også vera bindande for Statens eige vegvesen?

Statens vegvesen seier sjølv at ny E39 skal tena samfunnet i minst hundre år. Då bør ein også planleggja med mest mogeleg respekt for lokalsamfunn, natur og framtidige generasjonar.

Planane slik dei nå ligg føre, gjer ikkje det i stor nok grad. Difor må traseen endrast.

Thomas Førde
Veggruppa i Førde Bygdalag