Valestrand Mannskor med haustkonsert på heimebane

Koret hadde øvd lenge fram mot dette og hadde sett saman eit variert program på rundt tjue nummer, alt frå kjende og kjære tekstar av Alf Prøysen og Elvis Presley til nyare og friske låtar av Vassendgutane og Bjørn Eidsvåg med fleire.

Her var ei fin blanding av alt frå vare og rolege songar til viser og populærmelodiar med trykk og fengjande rytmar som nærast fekk kyrkja til å vibrera då det 22 mann sterke koret med orkester klemde i veg for full musikk.

Variasjon og ekstra liv

Konsertvert Dagfinn F. Bjørge leia konserten på humoristisk vis og med stø hand frå song til song. Takt og tone blei trygt vareteke av dirigent Preston James Kingsley. Koret sitt eige orkester, Ane Agdestein på el-piano, flygel og tverrfløyte, Hans Christian Andersen på bassgitar, Kjell Olav Møllerhaug på el-gitar og Endre Hetlesæter på slagverk og trekkspel sytte for musikken. I tillegg til sjølve koret var det både solistar og vokalgrupper som medverka til fin variasjon og ekstra liv i dei einskilde innslaga.

Utanom korsongane hadde både dirigent Preston og pianist Ane eigne solonummer. Nydelege innslag som gjekk rett til hjarta på tilhøyrarane.

Trefte publikum

Publikum song med på fleire av refrenga, og dei smilande andleta viste tydeleg at songane «gjekk heim». Stor applaus, smil og latter var bevis på at koret hadde treft godt med både repertoar og framføring, og koret på si side hadde òg ei svært så triveleg stund i kulturkyrkja denne tysdagskvelden.

Etter å ha sett publikumsreaksjonane og høyrt dei mange positive tilbakemeldingane etter konserten, var det tydeleg at konserten òg hadde vore ei fin oppleving for publikum, og at alt arbeidet med øving og terping på førehand hadde gjeve koret løn for strevet.

For dei som ønskjer meir korsong eller ikkje fekk med seg denne konserten blir den etter kvart så tradisjonelle julekonserten i Valestrand kulturkyrkje arrangert i midten av desember.

Bror Eivind Eriksen