Folketoneskattar med mange høgdepunkt

Konserten baud på mange høgdepunkt, blant anna med Berit Opheim si guddommelege stemme –  ei av dei aller fremste innan norsk folkemusikk i fleire 10-år.

Både «Den fagraste rosa» og «Se solens skjønne lys og prakt» med hennar vokal i vakkert samspel med Sigbjørn Apeland på orgel og Ingvild Habbestad på nøkkelharpe var bokstaveleg tala høgdepunkta for mange.

Ad Libitum-solistar

Framføringane til Ad Libitum var i all hovudsak arrangert av Kjell Habbstad, flotte og mektige, men også krevjande! Mellom anna avslutningsnummeret «Å for djup i Jesu Kjærleik» gav gåsehud til mange.

Berit Opheim var også solist på «Solrenning Sæle» og «Kilden» som vart godt mottekne. Men Ad Libitum stilte også med eigne solistar denne kvelden. Berit Katla song «Eg veit i himmelrik ei borg» medan Tiril Birkelid song avslutningsnummeret «Jeg er frelst å for en nåde» – begge med reine og vakre framføringar.

Ad Libitum tel no forøvrig borti 40 songarar, mange nye siste året, og framstår med god fylde og klang under leiing av Per Bjørn Habbestad.

Nydeleg klang

Ingvild Habbestad, som til dagleg er fiolinist i Kringkstingsorkesteret, trakterer det vakre instrumentet nøkkelharpe med presisjon, innleving og ein nydeleg klang. Kjell Pettersen fekk i samtale med Ingvild også fram historikk og karakteristika med dette unike og sjeldne instrumentet.

Og så barnekoret vårt då. Det er umogeleg å ikkje bli glade og rørte nå dei syng. For ein flott gjeng under kyndig leiing av Triril Birkelid. «Liti Kjersti» song dei åleine med vakre soloinnslag, medan dei song kveldssongen «Nedi Vester Soli Glader» vakkert saman med Ad Libitum.

Vår nytilsette organist i Sveio, Sigbjørn Apeland, imponerte på orgel og kjem garantert til å gi oss mange flotte musikalske opplevingar i åra som kjem.

Betydeleg investering

Dette var også konserten for innviing av det nye Petrof-flygelet, og me fekk under konserten høyra kva som bur i dette instrumentet – elegant og stødig  traktert av Kjell Habbestad. Per Bjørn Habbestad fortalte også litt om denne betydelige investeringa, der Gjenbruksløa spelar ei sentral rolle som garantist for investeringa.

Nå gler Ad Libitum seg til julekonserten den 14. desember, og til våren planlegg dei konsert med sjølvaste Heine Totland den 15. mars. Det er berre til å gle seg til fleire flotte musikalske opplevingar framover.

Bjørn Storebø