kultur
Til Valevåg med juletre
Fredag kjem det verna fraktfartøyet «Nyborg» til Valevåg, lasta med juletre frå Bjoa og julebrus frå Stord.
Valevåg er første stopp på salsturneen. «Nyborg» skal vidare til Rosendal, Vikane i Ølve, Halsnøy, Mosterhamn, Fitjar og Dåfjorden, fortel fartøyeigar Asgeir Andersen. Han og sambuaren eig frakteskuta, medan venelaget Foreningen M/S Gamle Nyborg er med på restaureringsarbeidet. Innimellom går dei turar for å visa fram skuta, og for å skaffa blest om, og inntekter til restaureringsarbeidet.
Under opphaldet i Valevåg blir det altså sal av juletre, lokalt produsert julebrus og andre lokale produkt. Det blir også servering av mat og drikke om bord, og tilbod om omvisning.
«Nyborg» var distriktets største snurpar då ho kom til Karmøy i 1946. Seinare blei båten omgjort til fraktebåt og hadde ulike eigarar. Andersen kjøpte henne frå Nord-Norge.
Asgeir Andersen bur i Dåfjorden. Han er engasjert i fartøyvern på fleire hald, mellom anna som maskinist om bord i gamle «Sunnhordland».
Kjem som bestilt
Mange har måtta avlysa sine arrangement grunna auka smitte i befolkninga. Ombord i det verna fraktfartøyet «Nyborg» er planane for helga spikra.
– Me let oss ikkje skremma så lett! Forutan litt restriksjonar, blant anna munnbind og meteren, påverkar ikkje smittesituasjonen oss stort tatt i betraktning av at dette er eit utandørs kulturarrangement, seier Asgeir Andersen.
Då Vestavind er på tråden middagstider torsdag kan fraktebåteigaren melda at «Nyborg» er på veg inn fjorden til Bjoa for å henta juletre.
