Suksessforfattar til kulturkyrja

Østerbø begynte som forfattar då ho blei pensjonert frå lærarjobben, og har fått ein uventa stor lesarkrins på kort tid. Romanane hennar er basert på faktiske hendingar.

– Verd å få med seg

– Dei som ikkje får med seg dette arrangementet vil gå glipp av noko stort, seier sokneprest Arild Steinsland.

Han skal intervjua Østerbø i kulturkyrkja om innhaldet i bøkene hennar. Arrangementet er ein del av Kulturveka i Sveio.

Østerbø er oppvaksen i Bergen og hentar historiene sine derfrå. Den første boka hennar, «Skammens mødre» kom ut i 2021 og selde i 14.000 eksemplarar. Både denne og oppfølgaren «Tatt av sviket» gav ho ut på eige forlag. No er ho ute med si tredje bok i same serie, denne gongen på Kagge Forlag. «Frihetens smerte» er tittelen på denne boka.

– Tar vare på livet

Østerbø skriv om unge kvinner som fekk barn utanfor ekteskap og om konsekvensene dette fekk både for dei sjølve og barna deira, ofte i fleire generasjonar framover. Ho fortel korleis kvinnene med «uekte barn» blei møtte både av offentlege instansar og av kyrkja, til og med i det som for mange av oss er samtid. Handlinga er lagt til tida frå 1950-talet og fram til no.

– Det handlar om kvinner i ein vanskeleg situasjon som valde å ta vare på livet, seier Steinsland, som ser fram til «bokbadet» i kulturkyrkja.