Ser fram til verdisamtalane

Utbygginga er gjennomført med tilskot frå eigarane Bømlo kommune og Vestland fylkeskommune, sponsormidlar og litt lån.

– Det må eit jubileum til for å få gjennomført ei så stor utbygging, seier sokneprest Arild Steinsland i Sveio.

Initiativtakar

Han er styreleiar i Moster Amfi og Kyrkjehistoriske Senter, og initiativtakar til den utbygginga som no er gjennomført. Dessutan er han medlem av hovudkomiteen som Moster 2024 AS har oppretta for jubileet. I denne komiteen er elles også Petter Steen jr., tilsett i Sveio kommune, medlem.

Steinsland fortel at sjølve ideen til tusenårsjubileet for Kristenretten kom frå forgjengaren hans som styreleiar, prost Svein Arne Theodorsen, så tidleg som i 2011.

– Det er eit rettsjubileum me står framfor. Samstundes er Kristenretten inspirert av Bibelen sine verdiar. Det er blitt sagt at Norge har vore gjennom ein einaste revolusjon. Det var overgangen frå maktsamfunn til rettssamfunn i 1024. Det medførte ei dramatisk kursendring, med innføring av verdiar me i dag tar for sjølvsagde, men som mange har gløymt opphavet til.

– Verdiar me tar for sjølvsagde

Steinsland nemner retten til å velja ektefelle ut frå kjærleik, forbod mot å halda slavar og innføring av felles gravplassar for både fattige og rike som nokre eksempel på dei nye verdiane som fekk innpass og har vore med på å utvikla det demokratiske Norge.

– I ei tid der udemokratiske krefter vinn fram i demokratiske land, trur eg impulsane frå tusenårsjubilieet med stor vekt på historiske fakta, kan bli viktige både no og i framtida. Me ser utviklinga i Russland, men kanskje endå meir skremmande i USA og i europeiske land som Ungarn. Mot dette må me prioritera fellesskap framfor individualisme.

Han ser fram til mange høgdepunkt under jubileumsveka på Moster, og nemner blant anna verdisamtalane som han oppmodar både prestekollegar og andre samfunnsengasjerte personar til å delta i.

Rom for forskarar

– Dessutan gler eg meg til å opna vår eiga nye utstilling, seier Steinsland, som også har klare tankar om korleis arven frå tusenårsjubileet og Moster 2024 AS skal forvaltast vidare.

– Utbygginga av amfiet har også gitt rom for eit kyrkjehistorisk bibliotek. Dessutan har me kjøpt eit hus som kan nyttast til overnatting. Eg ser for meg ei stipendordning der forskarar kan koma til Moster og bu her ein periode medan dei fordjupar seg i kyrkjehistoriske tema, seier han.