Maleri og teikningar på ny utstilling

Dei to utstillarane er begge sjukepleiarar, busette i Haugesund. Brita Andenes Haaland har vidareutdanning i psykiatri, men også ei årseining i kunst og handverk frå Høgskulen på Vestlandet. Ho er sjølvlært som kunstnar, men har etter kvart skaffa seg kjennskap til ulike teknikkar på kurs med lokale kunstnarar. Dette går fram av ei pressemelding frå kulturfyrvaktar Ruth G. Ø. Eriksen.

Oppteken av einsemd

Haaland malar på store lerret. Ho brukar akrylmaling og ulike teknnikkar. Ho hentar inspirasjon frå himmel og hav og er oppteken av det einsame mennesket og djupet i kvart menneske, går det fram av pressemeldinga. Haaland har slektsrøter på Bømlo og var ofte der i barndommen. Morfaren sine forteljingar om livert på sjøen har også vore med å prega maleria hennar. Fleire lokale motiv er med på dei bilda ho ar med til Ryvarden.

Inspirert av pandemien

Anna Dorotea Theissen flytta frå Nederland til Haugesund som 16-åring i 1991. på Steinerskolen, der ho gjekk på vidaregåande, fekk ho kjennskap til ulike kunstformer og teknikkar av formingslærar Siggen Falkeid og kunstnar Ivar Rudi. Seinare fekk ho undervisning i teikning av kunstnar Bernhard Østebø.

Theissen var fascinert av teikning og små detaljar alt som liten. Ho har tatt dette opp igjen som vaksen. Pandemien blei eit vendepunkt for henne i så måte.

Ut juni

Utstillinga vil vera å sjå i Galleri Ryvarden fram til 30. juni, fortel Eriksen. Galleriet har ope laurdagar, søndagar og heilagdagar.