Les Vestavind GRATIS fram til vår nye abonnementsløysing er på plass!
frå papirarkivet
Arjen lagde sild med Wenche
Såg du Arjen og Wenche på tv sist fredag morgon?Denne saka var på trykk i Vestavind 1. desember 2005.
”Sildaprinsen” frå Tjernagel har vore hos Wenche Andersen i God Morgen Norge og laga matjessild. Korleis gjekk eigentleg det?
Likte ho silda?
– Det gjekk kjempebra. Etter sending åt både Morten Sandøy og Nils Gunnar Lid silda på den nederlandske måten – heil etter halen. Alle som jobbar bak kamera og i regien kom for å smaka, fortel Arjen.
Oppskriftene som blei brukt var hans eigne. Wenche hadde laga kanapéar, med både sennepsaus og tzsatsiki. Og fastfood-varianten fekk han også slått eit slag for.
Annonse
– Målet mitt er å få matjessild i lompe inn på bensinstasjonane, gliste Arjen, og laga til ei lompe med sild, rømme, løk og rødbetar. Programleiaren, som ikkje var særleg begeistra for pølsevarianten, bad fint om å få smaka sildelompa. Ho gumla og sa det var betre enn sursild, som ho ikkje likte.
Delikatesse
Matjessildsalet går strykande på Austlandet og i Stavanger. I Haugesund har det ikkje heilt tatt av.
– Matjessild er eit delikatesseprodukt, trur kanskje ikkje folk i Haugesundsdistriktet er heilt med på tanken å betala masse pengar for sild.
Annonse
– Dei vil helst ha silda gratis?
– Det var dine ord, ler Arjen.
– Kanskje ikkje gratis akkurat, men billig i alle fall.
I Oslo har han sørga for att både Bagatellesjefen og kjendiskokkar har fått prøvt matjessild. Silda finst alt i disken på den største delikatesseforretningen i hovudstaden. Går det som Arjen håpar kjem matjessilda på menyen til kokkelandslaget etter kvart også.
Annonse
Norsk sild
Matjessild er eit 100 prosent norsk produkt – men likevel framleis ukjent for nordmenn flest. I Nederland derimot er matjessild ein delikatesse. Der har dei eigne matjessildfestivalar, og når årets første sild kjem i land er det stor fest. Dei første sildespanna bli faktisk auksjonert bort.
Matjessild er eit typisk eksempel på at fiskeindustrien i Noreg lagar eit produkt som er høgt verdsett av andre, men som knapt nok har vore tilgjengeleg i Noreg. I alle fall heilt til Arjen Kraaijeveld på Tjernagel begynte å importera silda tilbake – frå Nederland.
