2.500 venta til utdanningsmesse

Frå alle sunnhordlandskommunane, inkludert Sveio, er elevar på niande og tiande klassetrinnet påmelde til messa. Bak utdanningsmessa på Stord står Stord Rotary Klubb. Messa blir arrangert for 33. gong dette året.

– Opplegget blir omtrent som tidlegare år. Godt og vel 70 utstillarar frå både offentleg og privat sektor vil presentera ulike utdanningstilbod og yrkesvegar. Me skal også dela ut utdanningsstipend og vinnarar av elevkonkurranse, fortel Grundevold.

Utdanningsstipend

Utdanningsstipendet blir det ut i samarbeid med Sunnhordland Kraftlag og er på 50.000 kroner. Studentar frå Sunnhordland som er under utdanning på høgskule- eller universitetsnivå, kan søkja på dette stipendet. Det same kan yrkesaktive som driv med utviklingsarbeid på sin arbeidsplass.

– I år har me fått inn ti-elleve søknader. Me skulle gjerne hatt fleire, men nå er fristen ute for i år, seier prosjektleiaren.

Gåvekort, heider og ære

Elevar som har levert inn elevoppgåve, er med i konkurransen om to gåvekort på 4.000 kroner kvar. Dessutan vankar det heider, ære og diplom til den skulen som leverer inn flest elevoppgåver i forhold til elevtalet på klassetrinnet.

–  Me har inntrykk av at utdanningsmessene gjennom åra har vore viktige for elevar som skal velja. Mange har fått stadfesta det dei trudde frå før. Andre har valt heilt andre utdanningar etter at dei var på messa og blei kjende med nye yrke og utdanningar, seier Grundevold.