Blei «skyttarprinsesse» i ordførarklassen

Linn Therese Erve (Ap) var konkurranseskyttar i ungdommen. Det er likevel såpass lenge sidan at 241 poeng av 250 er imponerande.

14 ordførar og statsforvaltaren i Vestland, Liv Signe Navarsete, deltok i ordførarduellen som Voss-ordførar Hans-Erik Ringkjøb (Ap) hadde invitert til. Klokka 13.00 laurdag braka det laus på Bjørkemoen.

– Innleiingsvis skaut me fem og fem skot. Eg låg ved sida av Sogndal-ordførar Arnstein Menes (Sp) som vann til slutt med 243 poeng. Etter dei ti første skota leia han. Etter 15 skot leia eg før me skulle avslutta med 10 skot, fortel Erve.

Høg puls i heiagjengen

Ho seier at det var spennande å kjenna på konkurranseinstinktet igjen på standplass. Og nervepirrande når det blei så tett i teten.

– Det var nok nervene som tok meg på slutten, men eg er veldig nøgd med 2. plassen, seier Erve.

Etter denne bragda kan ho kallast «skyttarprinsesse» blant ordførarane i Vestland.

Nervepirrande var det også for dei som såg på. Erve hadde med seg barn, tantebarn, søster og svoger som heiagjeng.

– Dei såg kor me traff før me sjølv såg resultata, og søster mi fortalde ho hadde hatt høg puls undervegs, ler Erve.

Brukte lang tid

Før ordførarduellen på Voss har ho trena litt med Olve Grønås Birkeland. Han skyt for Haugesund og Sveio og er Noregs fremste ungdomsskyttar dei siste åra. Olve kan mellom anna skilta med to gonger nordisk ungdomsmeister og vinnar av ungdomslaget under LS i 2022.

– Olve var med inn på standplass som mentor, og det var veldig trygt. Eg har også fått låna våpen av Olve og Arne, seier Erve.

Arne Birkeland var i si tid trenar for Erve då ho skaut aktivt, og han er godt nøgd med innsatsen.

– Olve og eg var litt bekymra for ein ting; at ho kom til å bruka for lang tid. Det var akkurat det som skjedde. Siste skotet blei nærast slengd ut for å rekka det innan tidsfristen. Men at ho klarar 241 poeng etter ho har vore så lenge vekke frå skytinga, skal innbyggarane i Sveio vera veldig nøgde med, seier Birkeland.

Siktar mot kongelaget

Det er tre blad Birkeland frå Sveio med under LS på Voss, Olve, Brynjar og far Arne. Brynjar har ikkje vore aktivt skyttar på ei stund, men hadde lyst til å vera med.

– Først er det felt i morgon (søndag). Måndag startar konkurransane på bane. Me kan jo drøyma om å nå heilt opp, men realistisk er det berre Olve som er god nok. Han er heilt oppe blant dei 30-40 skytterane i landet som kan skyta seg til ein plass på kongelaget, seier Birkeland.

I fjor skaut Olve to finalar same dag under LS. Først vann han ungdomslaget og vart beste ungdomsskyttar. Deretter la han seg til å skyta på plass 13 i kongelaget.

– Olve deltar på ungdomslaget for siste gong i år. Om han vinn ein gong til, har han gjort noko ingen har klart før. Målet for kongelaget er å gjera det betre enn i fjor, seier Birkeland.

Frå tysdag sender NRK direkte frå LS.