Vraket etter helikopterulykka kan liggje på 300 meters djup

– Vi har eit grovt estimat av kvar det ligg, og der er det ganske djupt. Vraket kan liggje på tre hundre meters djup, seier Kåre Halvorsen, avdelingsleiar for luftfart i Havarikommisjonen, til Bergensavisen.

Torsdag formiddag er kystvaktskipet KV Sortland på veg til området der det er grunn til å tru at helikopteret ligg.

Helikopteret var involvert i ei ulykke utanfor Sotra i Vestland onsdag kveld. Ein person vart stadfesta omkommen same kveld, medan fem andre er skadde. Årsaka til ulykka er ikkje kjend.

Nokre delar er funne

Om bord i helikopteret er det ein såkalla «svart boks», ein flyregistrator, der det også sit ei eining som sender lydsignal. Halvorsen seier til BA at denne skal hjelpe dei å lokalisere vraket, noko han antek dei kjem til å klare.

Undersøkingane etter ulykka starta onsdag kveld etter at redningsaksjonen var ferdig. Same kveld vart nokre delar av vraket plukka opp av redningsskøyta Kristian Gerhard Jebsen II.

– Vi sette omgåande i gang førebuingane for å få gjort ei best mogleg undersøking av ulykka, og vi sender folk til Stavanger og Bergen for å halde fram dette arbeidet, seier direktør William J. Bertheussen i Statens havarikommisjon til BA.

Vêret gjer situasjonen utfordrande. Det er venta vind frå sør med stiv kuling ute langs kysten med opptil 25 meter vind i sekundet og seks meter høge bølgjer.

Ein død, fem skadde

Av dei overlevande etter ulykka er ein av dei fem kritisk skadd, ein alvorleg skadd, og tre lettare skadde, opplyser Haukeland universitetssjukehus.

Alle seks som var om bord i helikopteret, vart henta opp av sjøen onsdag kveld.

Helikopteret var på øvingsoppdrag for Equinor og var knytt til områdeberedskapen for Oseberg-området i Nordsjøen. Ulykka fann stad utanfor Sotra, og det var eit av helikopterselskapet Bristows helikopter som var involvert.

Equinor i sorg

Equinor-sjef Anders Opedal takkar redningsarbeidarane som hjelpte til etter helikopterulykka onsdag, og seier at tankane til selskapet går til dei ramma. Han seier at alle dei seks som var om bord i helikopteret, var på jobb for Equinor.

– Dette er ei djupt tragisk hending. I dag er ein tung dag for mange. Våre tankar går til dei familiane, nære og andre som er ramma, seier Opedal til NTB.

Equinor har oppretta ein pårørandetelefon på 800 500 20 og har i samarbeid med politiet bidrege til å etablere eit pårørandesenter på Scandic Kokstad i Bergen.

– Oppgåva vår no er å bidra til å ta vare på dei involverte. Vi rettar ein stor takk til Hovudredningssentralen og alle involverte i redningsaksjonen og det arbeidet som no går føre seg, seier Opedal.

Stansar flygingar

Equinor stansar alle helikopterflygingar på norsk sokkel fram til klokka 18 torsdag av omsyn til dei ramma, men ønskjer å få helikoptera raskt tilbake i normal drift.

Også helikopterselskapet CHC Norge har stansa alle flygingar til sokkelen. Både dei og Bristow flyg helikopter av typen Sikorsky S-92 når dei fraktar offshorearbeidarar til den norske sokkelen.

Equinor gjer no nødvendige førebuingar for å få dette til på ein sikker måte, oppgir dei.

Tillit til etterforskinga

Fagforbundet til oljearbeidarane Safe har tillit til dei som handterer helikopterulykka utanfor Bergen, men ber operatørane på sokkelen styrkje beredskapen.

– Eg håpar dei set i verk beredskapsplanar, og at dei reduserer produksjonen. Dei må sørgje for minst mogleg risiko, seier Safe-leiar Raymond Midtgård til NTB.

Midtgard seier at dersom dei får grønt lys til å halde fram flygingane i Nordsjøen med helikoptertypen S-92, så vil Safe seie til medlemmene sine at det er trygt. Han trur ikkje helikoptera blir sette på bakken.

– Treng ein plan B

Likevel er han bekymra for at det berre er éin helikoptertype som flyg offshore i Noreg. Den andre typen, EC225 produsert av Airbus, vart sett på bakken permanent etter Turøy-ulykka i 2016.

Safe-leiaren understrekar samtidig at Safe lenge har etterlyst to helikoptertypar.

– No byrjar det å haste. Det er åtte år sidan førre ulykke, og vi har lenge etterlyst ein plan B. Det er for få helikopter i dag, seier Midtgård.

Produsent

Helikopterprodusenten Sikorsky seier dei er klare til å hjelpe Havarikommisjonen i etterforskinga av helikopterulykka utanfor Bergen onsdag.

– Vi er orienterte om ulykka og er klar til å hjelpe norske granskingsstyresmakter og kundane våre, uttaler Sikorsky UK til NTB.