nyhende
Utvalsleiar i Vestland fylke:
Vil spørja om busstakstar
Når hovudutvalet for samferdsel og mobilitet i Vestland fylke har møte komande onsdag, vil busstakstande mellom Sveio og Haugesund truleg bli tema. Dette opplyser leiaren i hovudutvalet, Jannicke Bergesen Clarke (Ap).
I kjølvatnet av fylkesdebatten i Sveio for kort tid sidan, har Clarke fått spørsmål frå fleire parti om noko kan gjerast slik at det blir billigare å ta buss frå Sveio til Haugesund.
Aktuelt tema
— Eg har grunn til å tru at det kjem spørsmål på møtet om dette temaet, seier Clarke.
Ho vil ikkje seia kven ho ventar spørsmål frå, men er klar over at temaet er aktuelt.
Skyss: — Må endrast politisk
Vestavind har også prøvd å få svar frå Skyss om noko kan gjerast med pris- og sonestrukturen som inneber at bussreisande frå Sveio til Haugesund må gjennom to takstsoner.
Leiinga i Skyss vil ikkje la seg intervjua på telefon, men pressekontakt Ingrid Dreyer skriv i ein epost at pris- og sonestrukturen er vedtatt politisk og derfor må endrast politisk. Ho viser derfor til den politiske leiinga i fylket.
