Vil byggja leilegheiter over Coop Extra

Salskonsulent Bjørn Storebø i Valvatne håpar salet av leilegheitene kan koma i gang på vårparten i 2026.

– Det føreset at me slepp å utarbeida ny reguleringsplan. Kjem det krav om ny regulering, blir salsstarten utsett til 2027. Ny reguleringsplan vil dessutan gjera kvar av leilegheitene 100.000-120.000 kroner dyrare, seier Storebø til Vestavind.

Spørsmålet om regulering er eitt av fleire forhold som må avklarast i tida framover. Storebø reknar med at resten av dette året vil gå med til tekniske avklaringar, utarbeiding av teikningar og så vidare. Gjennom tidlegare kontakt med kommunen har han fått signal om behov for små og rimelege husvære i sentrum.

– Slike leilegheiter trur eg det vil vera marknad for, seier Storebø.

12-14 leilegheiter

Sentrumsplanen opnar for bygging opp til 15 meter, det vil seia to etasjar oppå Coop Extra-bygget. Bygget er dimensjonert for ei slik påbygging. Dei skissene som no ligg føre, omfattar ei etasje med 12 leilegheiter på mellom 50 og 80 kvadratmeter. Storebø utelukkar ikkje at det kan bli snakk om ei etasje til med to leilegheiter på 100 kvadratmeter kvar.

Coop Extra-bygget blei sett opp i 2016. Per Bjørn Habbestad, som har representert Sveio Senter AS i forhandlingane med Valvatne, stadfestar at det alt frå starten av blei planlagt leilegheiter over butikklokalet. Når desse planane ikkje blei realiserte med ein gong, skuldast det mangel på parkeringsplassar. No har Sveio Senter løyst dette problemet ved å kjøpa ein tilstøytande eigedom, riva eit hus og opparbeida ein parkeringsplass med plass til 40 bilar.

– Det har alltid vore planen å overlata arbeidet med leilegheitene til eit firma som driv med bustadbygging. Då parkeringsspørsmålet var løyst, tok eg difor kontakt med fleire firma innan denne bransjen. Me kom til semje med Valvatne, fortel Habbestad vidare.

– Best utsikt

Korkje han eller Storebø vil ut med kva Valvatne må betala for å få tilgang til butikktaket. Begge seier likevel at dei har kome fram til ein avtale som etter deira meining vil medverka til ein grei pris på leilegheitene. Dei er også samde om at dei nye leilegheitene vil få Sveio sentrum sin flottaste utsikt, eit moment som også kan telja med i marknadsføringa.

Kva eigarform dei nye husværa vil få, er enno ikkje bestemt.

– No har me jo gode røynsler med burettslag frå Steinhaugmarka. Fleire forhold vil avgjera om det blir burettslag, andelslag eller sjølveigarleilegheiter over Coop Extra, seier Storebø.