Bli abonnent
Logg inn

nyhende

Opprydding i eigedomsportefølgja til Sveio kommune:

Slik ser det ut når formannskapet har Teams-møte, her 8. februar 2021. Møtet tok til klokka 17, og starta med ei rekke orienteringar. Klokka 21.30, forlet publikum samlinga, då møtet skulle behandla lukka saker. I første kolonne t.v. ser me rådmann Jostein Førre og Ruth G. Østebøvik Eriksen (FrP), deretter Linn Therese Erve (Ap), Lars Einar Hollund (H) og Håkon J. Skimmeland (Ap), og i tredje kolonne Monica V. Valen (Sp), Jarle Jacobsen (KrF) og Rune Teikari (FrP).
Slik ser det ut når formannskapet har Teams-møte, her 8. februar 2021. Møtet tok til klokka 17, og starta med ei rekke orienteringar. Klokka 21.30, forlet publikum samlinga, då møtet skulle behandla lukka saker. I første kolonne t.v. ser me rådmann Jostein Førre og Ruth G. Østebøvik Eriksen (FrP), deretter Linn Therese Erve (Ap), Lars Einar Hollund (H) og Håkon J. Skimmeland (Ap), og i tredje kolonne Monica V. Valen (Sp), Jarle Jacobsen (KrF) og Rune Teikari (FrP).

Vernar om enkelte bygg

Fleire parti tok tidleg standpunkt når det gjeld sal av kommunale bygg som bygdene bruker til aktivitetshus. Dei haldt ord då saka var oppe i formannskapet måndag kveld.

Publisert Sist oppdatert

Av dei nær 200 eigedomane som Sveio kommune eig, har rådmannen trekt ut 12 bygg som han kan tenka seg å avhenda. Måndag kveld tok politikarane i formannskapet stilling til saka, der det var tverrpolitisk semje om å behalda dei tidlegare skulebygga og Tinghuset, noko som blir anbefalt vidare til kommunestyret, som skal ta endeleg avgjerd i saka måndag 22. februar.

Det var Sveio Ap og Sveio FrP som fekk gjennom sitt framlegg til vedtak, for sjølv om dei sju politikarane er einige om å behalda skulane på Ørevik, Bua, Lid samt Tinghuset i Førde er det andre idear inne i bildet også.

I tillegg er Førde bygdalag interesserte i å kjøpa Tinghuset, opplyste rådmannen.

Arbeidsgruppe

Sveio Høgre, som har støtte frå Senterpartiet, KrF, MDG og SV, meiner det vil vera ei god løysing å setja ned ei arbeidsgruppe beståande av tre folkevalde og to kommunalt tilsette, som i lag skal gå gjennom kommunale bygg og eigedomar for å kategorisera og prioritera desse, for så å komma tilbake til kva som kan seljast.

– Kommunen har betydelege eigedomar, det bør vera fleire som kan seljast, seier Lars Einar Hollund (H).

Grønt lys for sal

Håkon J. Skimmeland i Sveio Ap synest det er gledeleg å sjå tverrpolitisk semje i saka.

– Sveio Ap var tydelege frå starten når det gjeld kommunale bygg me vil verna ekstra om, me veit kor viktige bygga er, sa Skimmeland, som landa på å gi grønt lys for sal av nokre av bygningane på lista.

Rune Teikari i FrP poengterte at det er viktig å få rydda eigedomsportefølgja, og på same tid betra økonomien til kommunen.

– Viktige eigedomar som skapar aktivitet, samhald og identitet skal ikkje seljast, men gjerast tilgjengelege, sa Teikari.

4 mot 3

Før gruppemøtet kommenterte rådmann Jostein Førre at ei politisk administrativ arbeidsgruppe, som Hollund la fram på vegner av fleire parti, blei fråråda, då det kan bli rot med slike grupper – kva er administrasjon og kva er politikk?

Han ba også om at politikarane fram mot kommunestyremøtet  kunne forklara nærmare kva ein bærekraftig driftsmodell er, i forhold til dagens situasjon, som går på forslaget frå Ap og FrP.

– Det er ein del eldre bygg, som har stor kostnad framover.

Etter det korte, digitale gruppemøtet, hadde FrP og Ap eit felles forslag, som blei vedteke 4 mot 3. Dei som stemte i mot, var Lars Einar Hollund (H), Monica V. Valen (Sp) og Jarle Jacobsen (KrF).

Felles framlegg frå Framstegspartiet og Arbeiderpartiet, som blir innstillinga til kommunestyremøtet 22. februar:
  1. Sveio kommune skal eige strategiske viktige eigedommar.
  2. Sveio kommune skal vurdere å kjøpe eigedommar som kan bli viktige å eige i framtida.
    1. Rådmannen legg bygga Introhuset, Prestebustad 2, Lothebygget, Lyngvegen 1B, Eagelbygget, Mannabergvegen 25, Solheimslia 7A og 7B for sal.
    2. Rådmannen bes gå i dialog med brukargruppene for Tinghuset, Gamle Bua skule, Bua «gamle gamle» skule, Gamle Ørevik skule, Gamle Lid skule for å få på plass ein berekraftig driftsmodell for desse. Rådmannen blir også bedt om å fremje sak som gjeld all bruk av kommunale bygg i regi av frivillige lag og organisasjonar, og då med mål om å sikra mest mogleg lik tilgang til og like vilkår for bruk for dei ulike brukargruppene.
  4. Rådmannen får mynde til å fastsette salspris med utganspunkt i marknadspris. For nokre bygg kan det bli naudsynt med politisk sak om det er krevjande å selje til marknadspris.
  5. For bygg som blir seld til samfunnspris legg ein til grunn at kommunen skal ha forkjøpsrett til eigedommen ved eit eventuelt vidaresal. I tillegg vil det være naturleg å vurdere andre vilkår.
  6. For nokre bygg/leilegheiter kan det være hensiktsmessig å vente med sal til brukar/leietakar flyttar ut eller om vi har midlertidig bruk for bygget.
Fellesforslaget frå H, Sp og KrF, også støtta av MDG og SV:
  1. Sveio kommune skal eige strategiske viktige og samfunnsnyttigeeigedommar.
  2. Kommunale bygningar og eigedomar som ikkje inngår i kommunal tenesteproduksjon, men som gir rom for aktivitet i regi av frivillige lag og organisasjonar bør eigast av kommunen og stilles fritt til rådigheit for disse.
  3. Dersom bygningar og eigedomar blir seld til samfunnspris, eller blir bygsla bort, skal ein leggja til grunn at kommunen skal ha forkjøpsrett til eigedommen ved eit eventuelt vidaresal. Det same skal gjelda ved opphøyr av aktiviteten/bruken. I tillegg vil det vera naturleg å vurdere andre vilkår.
  4. Kommunestyre opprettar ei arbeidsgruppe beståande av tre folkevalte og to frå administrasjonen. Arbeidsgruppa får i oppdrag å gå gjennom kommunale bygg og eigedomar for å kategorisere disse og gje si anbefaling til kommunestyret.
nyhende
Powered by Labrador CMS