– Verdas største dugnad

– Kvart sjette barn i verda er påverka av krig og konflikt, seier ordførar André Mundal Haukås (H), og viser til pamfletten frå Redd Barna.

– Eg håpar folk vert med og hjelper til, seier Guro Røher Eriksen, leiar for Frivilligsentralen.

Årets tv-aksjon går til inntekt for Redd Barna. Pengane skal nyttast til å hjelpe barn påverka av krig i seks land, mellom anna Noreg.

Takksam for fred

– Det går også til tiltak for barn som har kome hit i frå forferdelege situasjonar me ikkje kan førestilla oss, seier Haukås.

Dei siste dagars bilete frå Midt-Austen har vist kor hardt råka barn vert av krigføring, og gjev ei sterk påminning. Eriksen har sjølv barn, og ho er evig takksam for at ho lever i eit fredeleg land.

– Mine barn er kjempeheldige, og me veit ikkje kor godt me har det. Det kan vera vanskeleg for barn i Sveio å forstå korleis det kan vera for andre barn rundt i verda, seier ho.

Landa som er i fokus for aksjonen er Ukraina, Syria, Kongo, Bangladesh, Sør-Sudan og Noreg.

– Sveio har teke imot flyktningar frå tre av dei landa, seier Eriksen.

Mange år som bøssebærarar

Ho håpar skular og barnehagar tek initiativet og held ei innsamling. Allereie veit ho om foreldre som organiserer kafé med barna sine.

– Tv-aksjonen burde eigentleg kome inn under samfunnsfag i skulen, sidan dei er innom så mange tema om verda, og det er opplæring i dugnad, seier Eriksen.

– Har de vore bøssebærarar?

– Ja, svarar begge.

– I mange år har det vore ein kjekk og fin søndag, seier Haukås.

– Du er ordførar for ein kommune som har teke imot familiar som har flykta frå konflikt og vald. Korleis påverkar det deg?

– Mi første oppgåve som ordførar var ein ringerunde saman med andre ordførarar i Sunnhordaland, seier ordføraren.

For Haukås var det å studera i Sør-Afrika ei svært formativ oppleving, særleg då han fekk visa nær familie forholda ein kan verta fødd inn i.

– Eg fekk besøk av to brør, og dei fekk sjå kor heldige me faktisk er. Det er ikkje krig der, men berre fattigdomen åleine er utenkeleg for oss i Noreg, seier Haukås.

Mange måtar å hjelpa

Ordføraren er nøgd med korleis næringslivet har representert seg så langt i givinga, men håpar fleire bidreg.

– Det er jo verda sin største dugnad ifølgje Redd Barna, seier han.

Eriksen trur at årets aksjon kan vera ekstra sterkt for mange, sidan det utelukkande handlar om barn råka av krig.

– Og me kan sjå kor nært det har kome oss i Europa, legg ordføraren til og viser til dei pågåande kampane i Ukraina.

I ei trong tid kan det å gje bort pengar vera noko ein ikkje har anledning til. Det har dei forståing for. Alle er velkomne å hjelpa på kvar sin måte.

– Ein kan ha ein eigen aksjon kor ein lagar og sel ting, eller vera med å gå rundt med bøsser, seier Eriksen.