Varslar høge krav til knalltøft jordbruksoppgjer

Onsdag 27. april klokka 11 overleverer bondeorganisasjonane årets krav i jordbruksforhandlingane. Det er Norges Bondelag og Norsk Bonde- og Småbrukarlag som forhandlar med staten om rammevilkåra for alle norske bønder.

I forkant av forhandlingane varslar dei to organisasjonane at forventningane til årets oppgjer er høge. Bakteppet er galopperande kostnader på alle frontar, som svekkjer ei allereie dårleg lønnsemd.

– Vi går inn i forhandlingane med eit bakteppe få kunne førestille seg for eitt år sidan. Den økonomiske situasjonen i landbruket er svært alvorleg. Det handlar om både tydeleg inntektsløft og kompensasjon av ekstraordinære kostnader, seier bondelagsleiar Bjørn Gimming.

– Rekordhøgt krav

Krigen i Ukraina har bidrege til at norske bønder har fått auka utgifter til både straum, drivstoff og gjødsel.

Gimming har tidlegare omtalt det som «tvingande nødvendig» å få på plass ordningar som kan bidra til tryggleik for matproduksjonen. Hittil i år har unormalt mange storfeprodusentar bestemt seg for å leggje ned og sende dyra til slakt.

Bondeorganisasjonane pleier ikkje å gå ut med dei konkrete krava sine på førehand, men fylkesleiar Anders Felde i Vestland Bondelag gir eit kort hint om kravet i eit intervju med Klassekampen.

– Det blir rekordhøgt, seier bonden frå Breim.

Han understrekar òg at det vil komme krav om ein ny politikk for bøndene i tillegg. Mellom anna når det gjeld toll.

– Det må komme ei endring frå kronetoll til prosenttoll, seier han.

Tidenes tøffaste

Landbruksminister Sandra Borch (Sp) har på si side uttrykt vilje til å komme bøndene i møte, men ventar eit tøft oppgjer. Til og med det tøffaste nokosinne.

– Det vi no står i, er rett og slett ekstremt krevjande, og det gjer at vi går mot det tøffaste jordbruksoppgjeret nokosinne, slo statsråden fast overfor Nynorsk pressekontor tysdag.

Ho understreka at regjeringa ønskjer å tette inntektsgapet mellom bønder og andre næringar.

– No handlar det om å tryggje arbeidsplassane ved å kompensere for dei mange ekstra kostnadene. I tillegg må vi tette det store inntektsgapet mellom bønder og andre næringar, seier Borch.

Ho la likevel til at sistnemnde ikkje lèt seg gjere i éin omgang.

– Men vi må snu utviklinga i landbruket, og den snuoperasjonen må starte no, sa ho.

(©NPK)