nyhende
Utvidar med bubilverkstad på Hanaleite
Bubil- og campingvognforhandlaren Aktiv Caravan utvidar på Hanaleite i Førde. 10. februar opnar firmaet verkstad og utstillingshall. — Etter kvart kan det også bli fleire nye arbeidsplassar, fortel avdelingsleiar Øystein Tveit.
Aktiv Caravan i Førde er ei avdeling under firmaet med same namn på Kokstad i Bergen. Avdelinga i Førde opna i april i fjor, og har i dag tre tilsette. I tillegg kjem åtte i Bergen.
— Me har hatt godt sal av både bubilar og campingvogner. Både nytt og brukt. Og mest bubilar. Dei utgjer 80 prosent av salet dette første driftsåret. Men me vil satsa meir på campingvogner. Det er stor interesse for vogner i denne regionen, seier Tveit.
Frå 200 til 700 kvadratmeter
Butikklokala som Aktiv Caravan disponerer på Hanaleite i dag, er på 200 kvadratmeter. Den nye utstillingshallen og verkstaden vegg i vegg, er på 500 kvadratmeter, slik at dei dermed kjem opp i 700 kvadratmeter i tillegg til kontor i andre høgda.
Han fortel at godt over halvparten av vognene og bubilane dei har selt så langt, er brukte. Det handlar både om innbytte, brukte bilar eller vogner som er tatt inn for sal for kundar.
Når det gjeld omsetnadstal, har ikkje avdelinga i Førde eigen rekneskap. Rekneskapen for 2021 er ikkje ferdig enno. I 2020 omsette Aktiv Caravan AS for omlag 78 millionar kroner, og hadde eit resultat før skatt på 5,2 millionar kroner. Det var altså før avdelinga i Førde opna.
Gunstig tidspunkt
Kundane som har handla i Førde det første året, har kome frå heile regionen. Tveit fortel at dei er særleg opptekne av å auka salet til Bømlo og Stord, der det er få andre forhandlarar å konkurrera med.
Tveit er ikkje i tvil om at dei kom inn på marknaden i Sveio på eit gunstig tidspunkt, med reiserestriksjonar på grunn av korona og meir fokus på norgesferie. Men han trur tendensen vil halda seg.
— Nå har fleire fått augo opp for både bubil og norgesferie. Og når reiserestriksjonane forsvinn, kan dei kjøra endå lengre med bubilen sin, seier han optimistisk.
Verkstad for budelen
I tillegg til sal av bubilar og campingvogner, utfører Aktiv Caravan også fukt- og gasstestar. Når verkstaden kjem i gang, kan dei også utføra alle slag reparasjonar på budelen i bubilar og campingvogner. I tillegg kjem montering av diverse ekstrautstyr.
Dei får også einerett på garantireparasjonar i sitt område for dei merka dei er forhandlar for. Dette gjeld Frankia, Kabe, Mega Mobil og det aller nyaste, det islandske mini-campingvognmerket Mink.
— Me presiserer at dette er ein verkstad for budelen, ikkje ein bilverkstad. Reparasjonar på motor, drivverk og det som elles har med bilen å gjera, må utførast på bilverkstad.
Høgsesongen for sal av bubilar og campingvogner er mellom påske og haustferien, seier Tveit. Ein av grunnane til å etablera verkstad, er at dei også skal ha noko å gjera i dei stille vintermånadene.
For tida har det nyaste produktet, eit eksemplar av den islandske minicampingvogna Mink, fått plass inne i butikken. Tveit ser fram til å ta i bruk den nye utstillingshallen, der dei kan visa fram eit mykje vidare spekter av dei produkta dei er forhandlarar for.
Ledige kontorlokale
Aktiv Caravan leiger lokalet i industribygget lengst nordaust på Hanaleite. Multimekanisk Eiendom AS, som eig bygget, arbeidar aktivt for å få inn endå fleire leigetakarar.
Dette stadfestar Roald Hovland i Multimekanisk Eiendom overfor Vestavind. I andre høgda har dei klargjort 600 kvadratmeter for utleige. Det omfattar fellesrom, møterom og kontorplassar. Ein del av arealet er utleigd. Hovland seier at dei også er i forhandlingar med andre.
— Men me har også ledige lokale og er interessert i å koma i kontakt med fleire interesserte, seier han.
