Uro for ny tørkesommar

– Det er svært tørt mange stader i Sør-Noreg, og mange er bekymra for avlingane. Dette er ei bekymring eg delar, seier landbruks- og matminister Sandra Borch (Sp) til NTB.

Landbruksdirektoratet har høgna beredskapen. Dei meiner det er grunn til å vente mindre avlingar enn normalt i år.

– Eg har tett dialog med Landbruksdirektoratet om situasjonen slik at vi fortløpande kan vurdere nødvendige tiltak, seier Borch.

Milliarderstatning etter førre tørkesommar

Ho understrekar at det i Noreg er gode ordningar som kompenserer matprodusentar økonomisk dersom avlingane blir skadelidande av tørken.

Etter tørkesommaren 2018 vart det utbetalt rundt 2 milliardar kroner i erstatning til norske bønder. Norsk institutt for bioøkonomi (NIBIO) anslo at avlingstaps til bøndene var på over 3 milliardar kroner.

Statsråden fortel at ho har tett kontakt med jordbruksorganisasjonane om tørken.

– Eg har innkalla faglaga til møte med dette som tema førstkommande måndag, seier Borch.

Ventar dårlegare avlingar

I Landbruksdirektoratet får dei jamlege rapportar med oppdatert informasjon om situasjonen frå statsforvaltarane.

– Vi følgjer nøye med på korleis tørken utviklar seg, seier administrerande direktør Jørn Rolfsen i Landbruksdirektoratet til NTB.

No blir det rapportert om størst problem i Oslo og Viken, Vestfold og Telemark, Agder og Innlandet.

– Det er særleg på korn det er venta dårlegare avling enn normalt på grunn av svakare spiring og vekst, seier Rolfsen.

Ifølgje Felleskjøpet Agri er situasjonen lik eller verre sør og aust i landet enn i 2018, medan han er vesentleg betre på Vestlandet og i Midt-Noreg.

Bønder i tørkeramma område blir anbefalte å setje i verk tiltak, som tilpassa fôring.