Under 130 bedrifter har teikna fastprisavtalar på straum

Men så langt har interessa vore heller laber.

Ifølgje ei rundspørjing som Europower har gjennomført denne veka, har 47 bedrifter inngått ein fastprisavtale med Statkraft, medan 80 har inngått avtale med Lyse. Altså til saman 127 bedrifter.

Noreg har i dag 208.800 bedrifter med éin eller fleire tilsette, ifølgje tal frå SSB. Det betyr at så langt har berre 6 promille av bedriftene inngått ein fastprisavtale på straum.

Konfrontert med tala har statsminister Jonas Gahr Støre (Ap) éin konklusjon:

– Avtalane må bli betre, seier han til NTB.

Klar forventning

Rundt 90 prosent av kraftselskapa i Noreg er offentleg eigd av kommunar, fylkeskommunar og staten.

På spørsmål frå NTB om korleis han synest kraftselskapa har følgt opp oppmodinga frå regjeringa om å tilby gode nok fastprisavtalar, svarer Støre:

– Dei kan gjere det betre. Og fleire kan melde seg på. Det finst ei lang rekkje kraftselskap som ikkje har komme med tilbod.

– Ei klar oppmoding, altså?

– Ja. Ei oppmoding og ei forventning.

– Kva skjer dersom dei ikkje følgjer opp?

– Det får vi komme tilbake til.

Fire kraftprodusentar tilbyr i dag fastprisavtalar – Statkraft (gjennom straumselskapa Fjordkraft og Fortum), Lyse, Hafslund og Å Energi. Av desse er det berre Statkraft og Lyse som har inngått avtalar, viser oversikta frå Europower.

Ikkje fritt fram

Mange bedrifter har reagert på at avtalane inneber at dei må kjøpe like mykje straum dag som natt og vinter som sommar.

Frå kraftselskapa si side blir det påpeika at dei har eit stort rammeverk å ta omsyn til, og at det ikkje er fritt fram.

Ifølgje interesseorganisasjonen Fornybar Norge har regjeringa mellom anna stilt som krav at avtalane må seljast i faste volum for å unngå skattemessige tilpassingar og utholing av grunnrenteskatten.

Statkrafts pressetalsperson Lars Magnus Günther seier til NTB at dei i første omgang har prioritert å komme i gang så raskt som mogleg.

– På sikt vil vi også sjå på moglegheitene for å tilby meir skreddarsydde avtalar som treffer forbruksprofilane til bedriftene betre.

– Mange bedrifter meiner prisane er for høge?

– Statkraft prisar krafta på marknadsbaserte vilkår, slik alle selskapa er pålagde gjennom marknadsreguleringa, konkurranselova og reglane for statsstøtte, seier Günther.

Åtvarar

Støre meiner samtidig det er lovande at prisane har falle med rundt 30 prosent på éin månad.

– Avtalane kan bli betre ved at marknaden får tid til å verke, at bedriftene får meldt inn dei behova dei har, og at kraftselskapa svarer ut det. Derfor må vi ikkje stoppe opp no, seier statsministeren, som åtvarar mot å erstatte fastprissystemet med ei anna støtteordning no.

– Å stoppe opp og seie at no tek vi ein pause for å innføre ei mellombels ordning frå Stortinget, vil føre til at vi taper tid, seier han.

(©NPK)