Ulike sonegrenser skal vidareførast

Dette var eit sentralt spørsmål som kom opp under informasjonsmøtet med Telemarksforskning i slutten av oktober i år.

Rådmannen valde å senda spørsmålet vidare til Landbruks- og matdepartementet, og no er svaret kome. Brevet er underteikna avdelingsdirektør Nils Øyvind Bergset og seniorrådgjevar Håkon Grotli.

Viser til jordbruksavtalen

I dei årlege jordbruksavtalane blir det fastsett regelverk for utmåling av tilskott til norsk jordbruk. For nokre av ordningane er tilskottssatsane geografisk differensiert. Dette gjeld mellom anna distriktstilskott for mjølk og kjøt.

Landbruks- og matdepartementet opplyser at i jordbruksavtalen er det for ordningane med geografisk differensierte tilskottssatsar, til dømes distriktstilskott for mjølk og kjøt, lagt inn følgjande føresegn:

«Ved sammenslåing av hele eller deler av fylker og/eller kommuner som har ulike tilskuddssoner, videreføres sonegrensene».

«– I samsvar med føresegna over vil difor eit byte av fylke for Sveio kommune ikkje føra med seg endringar i nivået på tilskotta til jordbruksproduksjon. Men me vil peika på at Innovasjon Norge kan ha ulike prioriteringar i Vestland og Rogaland fylke», heiter det blant anna i svarbrevet frå departementet.

Landbruks- og matdepartementet gjer merksam på at satsane for einskilde av ordningane i denne avtalen nyleg vart auka gjennom tilleggstingingane mellom avtalepartane.

Uroa for grisen

Gjertrud Svartveit Osmundsen har ved fleire høve uttrykt skepsis til at Sveio skal bli ein del av Rogaland.

– Mjølka trur eg me beheld, det er grisen eg er mest bekymra for. Når det gjeld tilskott for gris har me fått forskjellige svar, og då lurer eg på kva som skjer, seier slaktegris- og mjølkeprodusenten på Nordskog.

Åshild Irene Lie ved landbrukskontoret bekreftar at når det gjeld mjølk er dette sikra, då det er bestemt av landbruksdirektoratet at ein ikkje skal endra soner sjølv ved fylkesbytte/kommunesamanslåingar.

– Landbruksdirektoratet har også sagt at distriktstilskotet for gris skal behaldast. Meir enn dette har me ikkje. Då må ein kontakta andre instansar som sit og jobbar med tilskotsprisar, opplyser Lie til Vestavind.

Les meir om jordbruksavtalen her