— Trur me kanskje har fått vener for livet

Seks elevar frå kvart land, og til saman 10 lærarar hadde tatt turen til Sveio. Dette i samband med Erasmus-prosjektet, eit europeisk initiert samarbeidsprosjekt for å fremje samarbeid i Europa, og som Sveio skule har vore ein del av i om lag 20 år.

— Det er jo viktigare no enn nokon gang et europearar vitjar kvarandre, og spesielt ungdommen, sier Elisabeth Enerstvedt. Ho er ein av dei tilsette med lengst røynsle med Erasmus-prosjekt i Sveio skule, og som er ein støttespelar for ein travel prosjektleiar Sølvi Hovda.

Internasjonalt valfag

Det er elevar som har vald internasjonalt samarbeid som valfag, som får høve til å delta i prosjektet. I vår var fleire av dei på Erasmus-reise til Italia, og no var det altså Sveio sin tur til å vere vertskap. Dei utanlandske elevane kom til Sveio sist sundag, og vart innkvartert i familiar til elevar ved skulen.

— Det var spennande å få ein framand og utanlandsk elev inn i heimen, og veldig kjekt. Me har fått god tid til å bruke engelsken me har lært i praksis, fortel Mathilde Haaversen og Ingrid Andrea Kvalvåg Panayiotou. Dei har hatt høvesvis Michele Torn frå Italia og Sabine Tellier frå Frankrike heime i sine familiar.

Flotte turar

I løpet av veka har gjestane vorte kjende med korleis skulekvardagen er i Noreg, og dei har reist rundt på heile Haugalandet for å bli betre kjent med regionen. Dei har mellom anna reist på ribtur til Røvær, kor dei besøkte Havbrukssenteret. Og dei har vore i klatreparken i Nedstrand. Det er særleg naturen Sabine og Michel har merka seg. Dei var også heldige med vestlandsvêret, då dei i strålande vêr gjekk dei til Himakåna, den kjende fjellformasjonen ved Nedstrand i Tysvær.

— Det var ei flott oppleving, seier dei to.

Dei skryt også av vertsfamiliane sine.

— Dei har teke så utruleg godt vare på oss, seier Michel.

Dei fleste hadde elles rekt å bli litt kjente med kvarandre via sosiale media før dei kom på besøk.

— Sånn var det ikkje då med starta opp for 20 år sidan. Då skreiv med brev til kvarandre i forkant, fortel lærar Elisabeth Enerstvedt.

— Vener for livet

Torsdag var siste besøksdag. Då vart opphaldet i Sveio avslutta med leik og aktivitetar i idrettshallen i Vigdartun. Der sto mellom anna slalåm på rullebrett og skiskyting på programmet. Og stafett på lange ski – spesialbygd for seks personar– utfordra elevane sine samarbeidsevne litt ekstra.

Og det var berre blide elevar å sjå då Vestavind var innom.

— Eg trur nok kanskje me har fått venar for livet her, seier Ingrid Andrea Kvalvåg Panayiotou.

Til hausten skal Sveio-elevar på reise til Tyskland, mens ei anna gruppe skal til Ungarn eller Italia til våren.