nyhende
Tre dagar til sak om drapsforsøk
Haugaland og Sunnhordland tingrett har sett av tre dagar til straffesaka mot ei kvinne i 30-åra som er tiltalt for drapsforsøk på ektemannen sin.
Som Vestavind skreiv 28. mai, startar rettssaka 10. september.
Grunnlaget for tiltalen er ei hending på ei privat adresse i Sveio i mai 2022. Kvinna skal då ha stukke mannen i halsen to gonger med kniv. To samleårer og pulsåra blei skada. Mannen overlevde etter rask førstehjelp på staden og operasjon same natta.
Påstår naudverge
Kvinna blei pågripen og framstilt for varetektsfengsling, men tingretten trudde kvinna si forklaring om at ho handla i naudverge og gjekk ikkje med på varetektsfengsling.
– Me er overraska over at det blei tatt ut tiltale, seier kvinna sin forsvarar, advokat Elisabeth Rød ved Elden advokatkontor i Haugesund til Haugesunds Avis.
Risikerer lang fengselsstraff
Kvinna blei først sikta for grov kroppsskade. Kort tid seinare blei siktinga endra til drapsforsøk. Ho er tiltalt etter paragraf 275 i straffelova, som handlar om drap og har ei strafferamme på 21 års fengsel. Det blir også vist til paragraf 16, som handlar om forsøk.
Statsadvokat Nina Grande ved Rogaland statsadvokatembeder er aktor i straffesaka, som skal først i tingretten sine lokale på Stord. Advokat Benedicte Storhaug ved Advokatene Storhaug & Paascje i Haugesund er bistandsadvokat for den fornærma mannen.
