nyhende
Travle døgn for brøytemannskapa
For brøytemannskapa har 2025 fått ein hektisk start. – Våre folk var i arbeid mesteparten av natt til tysdag, seier leiar for drift og anlegg i Sveio, Frederik Aalo Flood.
Sveio har tre tilsette på dagtid som arbeidar med vegvedlikehald, herunder brøyting. Ved tett snøfall som måndag ettermiddag og kveld, må dei ut på overtid. I tillegg nyttar kommunen ein del private firma som brøyter på kontrakt.
100 kilometer å brøyta
– Sveio kommune har rundt 100 kilometer med kommunale vegar som skal brøytast og eventuelt strøast. I tillegg kjem nokre kilometer med sykkel- og gangvegar og parkeringsplassar og område elles rundt kommunale bygg, fortel Flood.
Som strømiddel nyttar kommunen sand eller ei blanding av sand og salt.
– Rekk de over alt ved så tett snøfall som me har hatt dei siste dagane?
– Ja, det gjer me. Men det tar litt tid å koma rundt. Folk må berre vera litt tålmodige.
Tålmodige sveibuar
– Er sveibuane tålmodige, eller får de mange klager?
– Eg opplever at dei er tålmodige. Me har ikkje fått klager desse dagane. Men nokre spørsmål blir det jo.
Snømengda varierer mykje frå år til år.
– Er brøytebudsjettet dykkar dimensjonert for toppar som den me har opplevd dei siste dagane?
– Så langt er det inga krise. Me har jo ikkje hatt så mykje snø tidlegare denne sesongen. Korleis resten av vinteren blir, vil sjølvsagt vera avgjerande, seier Flood.
