To utlendingar mista førarkortet

Kontollen pågjekk frå 10.30 til rundt 13.30 i både 60- og 80-sona på Haukås. Resultatet blei 20 forenkla forelegg og to førarkortbeslag.

Mannen som mista førarkortet i 60-sona blei målt til 93 km/t. Han køyrde i tillegg forbi ein annan bil.

Den andre mannen som blei målt til 117 km/t i 80-sona, måtte UP senda ein bil etter for å få stoppa.

Køyrde i følge

– Det var to forholdvis unge menn og utanlandske turistar, og dei to bilane viste seg å køyra i følge, seier Malvin Kvamme, gruppeleiar for UP på Haugalandet.

Sjøl om det blei mange bøter, var dei fleste godt unna farten til dei travle turistane.

– Det som gjekk igjen hos ein del av dei som fekk forelegg, var at dei forklarte at dei ikkje hadde fått med seg at dei var i ei 60-sone. Sjølv om dei hadde passert fleire 60-skilt før dei blei stoppa, seier Kvamme, som oppmodar bilistane til å ha fokus på vegen og ikkje andre ting.

Behov for kontrollar

– Det er ei stund sidan sist det var kontroll på Haukås?

– Etter mykje merksemd i media ein periode, og fartsvisar i 60-sona, såg det ut til å roa seg, og me brukte ressursane andre stadar. No fann me ut at det var på tide å ta ein tur til Haukås igjen, og kontrollen måndag viser at det framleis er behov for oss der, seier Kvamme.

Bøtesatsar frå 1. februar 2024

60 km/t eller lågare:

• Til og med 5 km/t: kr. 1.150
• Til og med 10 km/t: kr. 3.150
• Til og med 15 km/t: kr. 5.650 (+ 2 prikkar)
• Til og med 20 km/t: kr. 8.200 (+ 3 prikkar)
• Til og med 25 km/t: kr. 12.700 (+ 3 prikkar)
• Over 25 km/t: inndraging av førarkort

70 km/t eller høgare:

• Til og med 5 km/t: kr 1.150
• Til og med 10 km/t: kr. 3.150
• Til og med 15 km/t: kr. 5.050
• Til og med 20 km/t: kr. 7.050 (+ 2 prikkar)
• Til og med 25 km/t: kr. 9.550 (+ 3 prikkar)
• Til og med 30 km/t: kr. 12.700 (+ 3 prikkar)
• Til og med 35 km/t: kr. 15.200 (+ 3 prikkar)
• Over 35 km/t: inndraging av førarkort