nyhende
To entreprenørar slår seg saman
Birkeland Maskinentreprenør og T. Halleland slår seg saman til eit selskap. Halleland blir fusjonert inn i Birkeland Maskinentreprenør, og samstundes blir namnet til Birkeland AS. Endringa trer i kraft 1. januar 2021.
Det blir teke høgde for om at konkurransetilsynet skal godkjenna transaksjonen. Det nye selskapet vil bestå av 90 tilsette og hadde i 2019 ein samla omsetnad på 175 millionar. Målet med samanslåinga er å styrka posisjonen ytterlegare som den leiande entreprenøren på Haugalandet og Sunnhordland, blir det opplyst i ei pressemelding som kom til Vestavind måndag morgon.
Ekrene Næringspark blir base
Stangeland Gruppen kjøpte september 2019 prosent av drift- og eigedomsselskapet T. Halleland, og i mai 2020 blei også 50 prosent av Birkeland Maskinentreprenør as ein del av konsernet. September 2020 kjøpte Stangeland Gruppen resten av Halleland og eig nå 100 prosent av T. Halleland AS.
Kai Peder Birkeland blir dagleg leiar, og Torleiv Halleland blir marknadssjef i Birkeland as. Stangeland Gruppen eig 60 prosent og Kai Peder Birkeland eig 40 prosent. Hovudkontor med administrasjon og verkstadfasilitet skal vera i tidlegare Halleland sine lokale på Ekrene Næringspark i Sveio. Birkeland AS har også kjøpt 50 prosent av Birkeland & Tyse Bergsprenger AS.
Klar for større oppgåver
I pressemeldinga som blei sendt ut, understrekar Torleiv Halleland kor viktig det er å vera ein trygg, attraktiv arbeidsplass.
– Satsinga og veksten gir oss moglegheiter også som arbeidsgjevar. Me har alt mange felles verdiar som arbeidsglede, innsats og ærlegdom. Nå skal me løysa enda større og meir komplekse oppgåver. Det meiner me dannar grunnlag for ein attraktiv arbeidsplass for tilsette med mål om å utvikla seg både som fagfolk og leiar. Dette seier Halleland, som framhevar spesielt arbeidet med lærlingar, digitalisering og det grøne skiftet som fokusområde.
